Tanba iha situasaun ida ne’e presu sasan hanesan fós iha merkadu komesa sa’e.

Centru Lojistika Nasional (CLN) hanesan liman-ain governu no estadu nian tenki marka mós prezensa iha ne’ebá halo hikas fali presu ne’e fila ba normal.

Entaun ida ne’e mak CLN agora tenta hela hodi organiza ho  autoridade lokal sira atu halo intervensaun.

“Ita koloka ba halo intervensaun iha merkadu iha munisipiu Covalima ne’e hamutuk fós 1000 toneladas, husi 1000 toneladas ne’e ita hakarak atu autoridade no pontu vokal husi MTCI sira iha ne’ebá sei tur hamutuk ho CCI-TL no mós kompaña lokal sira atu haree oinsa halo distribuisaun ba postu sira hotu iha Covalima,”dehan nia iha knar fatin CLN Fomentu (4/3).

Nia hatutan, ho ida ne’e CLN buka hela mekanismu ho prosesu tomak ne’ebé iha no agora dadauk dokumentus munisipiu Covalima nian tama ona mai iha CLN, nune’e parte aprovisionamentu sei tuur hamutuk hodi haree no deside loron ida ka rua nia laran komesa distribui fós sira ne’e ba ona Covalima.

Aliende, distribui ba Covalima CLN mós sei distribui tan fós 1000 toneladas ba munisipiu Bobonaro.

Kuaze ba munisipiu hotu distribui 1000 toneladas, maibé agora espesifiku liu ba munisipiu rua, Covalima no Bobonaro.

Iha sorin seluk, Prezidente Autoridade Munisipiu Covalima, Afonso Nogueira Nahak hatete, informasaun ne’ebé parte autoridade simu husi CLN iha inkontru katak, intervensaun CLN nian ba merkadu Covalima maske liu husi kompaña lokal maibé tenki fa’an fós ho kada saka kilogram 25 ho presu $12.

“Fós ne’ebé CLN prepara la signifika fahe gratuita ba komunidade sira maibé atu halo intervensaun ba merkadu atu normaliza fós folin iha merkadu,”dehan pontu vokal ba servisu komersiu industria iha Covalima

Entretantu Ministériu Turismu Comercio no Industria (MTCI) identifika ona kompaña rua ne’ebé atu simu fós iha fronteira entre munisipiu Covalima ho Ainaro mak hanesan, kompaña Arumi no Goronto.