Bispu Dili hateten, kongratula ba lider partidu polítiku sira hotu no kongratula mós ba povu Timor laran tomak tanba la’o kuaze semana rua resin ona maibé la rona buat ida no hotu-hotu la’o hakmatek.
“Ha’u haree iha Dili ne’e laiha tensaun uitoan ka barullu hanesan uluk ne’e laiha ona,” dehan Don Virgílio, hafoin suru-mutu ho Sekretáriu Jerál partidu FRETILIN, Mari Alkatiri, iha Episkopál, Bidau-Lesidere, Tersa (4/7).
Reuniaun ne’e partidu FRETILIN atu hato’o ba Igreja Katólika kona-ba programa partidu nian ne’ebé fó sai ona ba eleitór sira iha territóriu Timor tomak durante tempu kampaña nia laran.
“Ha'u agradese tanba sira (FRETILIN) rekoñese nafatin papél igreja ninian iha dezenvolvimentu país ida ne’e ninian, atu nune’e ha'u mós bele hatene buat ne’ebé sira halo daudaun iha ita nia rain,” dehan Bispu.
Amu bispu hateten, hafoin rona, nia mós fó hanoin ba malu, troka ideia ba malu bainhira manan oinsá bele kontribui ba rain nia di'ak.
Iha fatin hanesan, Sekretáriu Jerál FRETILIN, Mari Alkatiri, rekoñese katak Igreja Katólika nia papél importante tebes iha Timor Leste, liuliu atu ajuda sosiedade tomak para kompriende didi'ak oinsá hametin pás no instabilidade ho sentidu ba sidadania.
Nia dehan, Amu Bispu mós kontente tanba semana rua ona kampaña buat hotu-hotu la'o ho di'ak, la hanesan ho situasaun iha eleisaun prezidénsia no lejizlativa tinan uluk nian.
“Ha'u husu ba Amu Bispu atu reza nafatin atu kampaña ne’e to’o fim ho di'ak, atu nune’e povu bele eskolla ho sira nia konxiénsia rasik atu hili sira nia na’i ulun ida ne’ebé bele hadi'a duni povu ida ne’e nia moris,” tenik Mari.
Nia hatutan, Amu Bispu dehan de'it katak Governu foun mai sé de'it mak atu ukun tenke hadi'a liu setór sira importante ne’e hanesan edukasaun, agrikultura, saúde no ekonomia tomak.
Nia dehan, FRETILIN dezde kolabora kooperasaun di'ak ho Igreja tanba ema maka halo issue barabarak halo hanoin dehan FRETILIN ho Igreja ne’e fila kotuk ba malu, FRETILIN ho Igreja ne’e fila kotuk ba malu ne’e susar tebes, tanba ema barak maka FRETILIN nia-oan.
