Tuir Bankada Partidu Demokratiku (PD), Adriano do Nascimentu hatete, propagasaun surtu ne’e eziste tanba halo movimentasaun nune’e tenki suspende atividade eskolár iha Munisipiu Kovalima.
“Ha’u rona Covid-19 ne’e kona estudante ida, tanba ne’e ha’u husu bainhira mak suspende atividade eskolár, merkadu no mós funsionariu Estadu nian iha Munisipiu Kovalima,” dehan nia liu husi Plenaria ba debate estensaun EE ba dala-11 iha Parlamentu Nasional (1/3).
Entretanto Deputadu Bankada Partidu Libertasaun Popular (PLP) Abel Pires husu mós ba Governu atu foti desizaun hodi suspende ona atividade eskolár iha Munisipiu Kovalima atu nune’e bele hamate propagasaun surtu Covid-19.
“Ha’u husu suspende atividade eskolár no atividade sira seluk ne’ebé iha tanba atividade sira ne’e mak sai propagasaun ne’e lao nafatin”. Nia informa
Enkuantu Deputadu ne’e mós hanesan Ema Kovalima Oan ne’ebé fó hanoin ba MEJD, no nia hanesan reprezentante povu, nune’e husu ba MEJD atu foti ona desizaun hodi suspende atividade eskolár no ekipa saude mós kontinua hala’o servisu.
