ASSANAMI: PD Siviliza Nia Ema Hatene Respeitu Featured

By Jonio da Costa Jullu 26, 2020 1885
PD halo Konsolidasaun iha RAEOA hodi Hametin Estrutura no Militante, Sabadu, (25/07). FOTO: INDEPENDENTE/Jónio da Costa PD halo Konsolidasaun iha RAEOA hodi Hametin Estrutura no Militante, Sabadu, (25/07). FOTO: INDEPENDENTE/Jónio da Costa

RAEOA: Partido Demokratiku (PD) nia dever tomak ho responsabilidade ba Estadu atu bele eduka estrutura sira iha kraik sai hanesan prosesu sivilizasaun, demokrátizasaun no modernizasaun ne’ebé tenke lao ona iha estrutura baze nian.

Tanba PD nia misaun boot ida maka, siviliza, sai ema demokrátiku, sai ema ne’ebé hatene respeitu, hatene nia dever ho direitu atu lao hanesan sidadaun ida ne’ebé di’ak ba nia rain.

Ho misaun boot ida ne’e, PD hala’o ona nia safari Polítika hadulas Munisípiu 13 inklui RAEOA, hodi halo konsolidasaun hametin konfiansa militante husi Bazé too Nasionál ne’e atu rona problema sira iha kraik atu alerta ba hotu-hotu nia hanoin no pensamentu tenke hanesan ba oin.

Konsolidasaun ne’e mós, atu hametin liu tan estrutura, mai halo dialogu ho estrutura, hatene sira nia problema hodi resolve no lao hamutuk hodi prepara án di’ak liu tan atu hasoru eleisaun Jeral iha tinan 2023.

Prezidente PD, Mariano ASSANAMI Sabino hatete, tempu too ona atu reforsa estrutura PD husi aldeia too suku atu nunee ezisténsia Partidu Demokrátiku bele metin ho di’ak.

Tanba situasaun empase pólitika ne’ebé kontinua implika ekonomia seidauk lao normal. PD alerta ba estrutura hotu-hotu atu hakaas án servisu hodi partidu ne’e bót no apoiu nia firmeza ba Estadu ida ne’e hodi bele konstrui ho di’ak nunee sai Estadu ida ne’ebé forte hodi bele lao ba oin.

“Hanesan ita haree iha toma de posse nee estrutura balun foin maka hetan toma de Posse hanesan Postu ho Aldeia balun neebé maka eleitu ona iha kongressu 2017 nian maibé la konsege hetan toma posse iha tempu nebá entaun ohin fó toma de posse par sira iha lizitimasaun no legalidade atu bele servisu di’ak liu tan ba kraik,”dehan ASSANAMI, Sabdu (26/7), iha Salaun Paroquia Oecusse.

PD tenki hadulas Munispiu sira ho pensamentu hanesan hodi hakotu empasse politika ida ne’e liu husi dalan dialogu no oinsa PD bele normaliza fali komunikasaun politika.

Prinsipiu ida seluk mos oinsa atu normaliza fali funsionamentu instituisaun demokrátiku sira ne’ebé dalaruma iha mosu konflitu, hanesan konflitu iha Parlamentu Nasionál sira baku malu, kuaze koalia diferensia barak liu duke koalia programa ne’ebé povu halerik.

Rate this item
(0 votes)

Independente Digital TV