Asaun MUTL Rezulta Na’in Sanulu Tama Ospitál Featured

By INDEPENDENTE Agostu 22, 2017 789
PNTL kaptura estudante halo asaun kontra lelaun karreta PRADO PNTL kaptura estudante halo asaun kontra lelaun karreta PRADO

DILI: Estudante atus ba atus kontinua halo manifestasaun kontra polítika deputadu sira kona-ba leilaun karreta Prado, Segunda (21/8).

Rezultadu husi asaun ne’e ema na’in sanulu tama ospitál hodi halo tratamentu saúde tanba tanba hetan pankada no kauza husi gás lakrimojéneu (gas air mata) ne’ebé lansa husi Polisia Nasionál Timor-Leste (PNTL).

Xefe Emerjénsia Ospitál Nasionál Guido Valadares (ONGV), Nilton do Carmo Silva hatete, sala emerjénsia simu pasiente ne'ebé halo manifestasaun na'in 10

“(Pasiente sira) ne’e kuaze feto hotu ho sira nia kondisaun kmaan hotu no laiha ida maka kanek todan,” dehan nia, iha HNGV, horisehik.

Husi pasiente sira ne’e, médiku sira identifika iha estudante ida mak hetan pankada iha parte kanotak nian no ida seluk kanek iha parte ain, maibé la hamosu kanek grave.

Na'in 10 ne'ebé tama iha salaun emerjénsia ne’e pesoál saúde halo teste ba kondisaun maibé laiha ema ida maka kanek todan. Pasiente sira ne’e tama sala emerjénsia hahú tuku 11:00 pesoál saúde halo observa haruka alta kedas.

Karreta Estadu 13 Hetan Tuda

Hamutuk ho momentu Movimentu Estudante Universitáriu Timor Leste (MUTL) halo manifestasaun viatura Estadu 13 hetan tuda. Ho akontesimentu ne’e, Polisia Nasionál Timor-Leste (PNTL) detein ema na’in ne’ebé envolve iha manifestasaun.

Asaun ne’ebé MUTL halo sai dezorganizadu bainhira asaun ne’e sei namanas iha orasiu. Asaun anarkizmu derrepente mosu ho tuda husi kotuk kona membru polisia.

Ho asaun ne’e, membru PNTL mós halo agresaun fíziku ho tiru gás lakrimojéneu ba manifestante sira. Nune’e, sira ne’ebé envolve asaun ne’e rasik halai namkari. Estudante sira, liuliu feto sira barak mak dezmaia, ambulánsia ho bombeiru evakua kedas pasiente sira ne’e ba HNGV halo tratamentu.

Hafoin konfrontasaun ne’e, PNTL Kaptura estudante na’in 13 hodi detein sela PNTL Munisípiu Dili.

Segundu Komandante PNTL Munisípiu Dili, Euclides Belo hateten, enkontru ho koordenadór no portavós hatún deklarasaun dehan asaun pasifika, maibé ikus mai sai fali anarkizmu. Ne’e duni, polisia tenke atua hodi hakalma situasaun.

“Ami kaptura sira na'in 13 tanba sira envolve iha asaun ne’e hodi tuda fali ami,” dehan nia.

Nia hatutan, prosesu investigasaun ba na’in 13 ne’e kontinua, bainhira remata sei entrega ba ministériu públiku.

Alende ne’e, Euclides dehan, membru polisia na'in tolu mak hetan tuda husi manifestante sira.

Ne’e duni, nia dehan, hahalok sira ne’e konsidera anarkizmu, saida mak MUTL sira halo ne’e la bazeia ba konkordánsia antes ne’e koordenadór movimentu sira deklara ba Polisia. 

Rate this item
(0 votes)

Independente Digital TV