Arão Noe hato'o preokupasaun ne'e relasiona ho kazu pozitivu Covid-19 ne'ebé sempre akontese wainhira besik termina ona EE no halo tan extensaun ba EE, liu semana ida kazu refere laiha ona.
“Ha'u hare’e wainhira besik atu remata Estadu Emerjénsia (EE) sempre akontese kazu pozitivu ida, ne'e halo hau dúvidas oituan,” dehan nia ba Jornalista sira iha Parlamentu Nasionál (PN), Kinta(01/10).
Nia hateten wainhira besik remata EE ita iha kazu Pozitivu Covid-19 ona, hafoin extende tan EE liu semana ida lakon fali ona depois kuandu besik fali ona atu termina mosu fali ida, hare’e ba buat sira ne'e hanesan regula kedas ona tanba la'ós dala ida maibé beibeik ona.
Deputadu ne'e akresenta, wainhira governu iha inisiativa atu halo extensaun ba EE, nia husu atu halo extensaun de’it ba EE no la presiza atu halo konfuzaun ba públiku ho kazu pozitivu Covid-19 iha Timor Leste.
“Ida ne'e hamosu dúvidas tanba la'ós dala ida deit, mosu ona dala haat ka dala lima hanesan nee, hau hanoin la presiza atu halo hanesan ne'e hakarak atu extende, extende de’it too” hakotu nia.
