Arão Deklara Prontu Tuun husi Kadeira Prezidente PN Featured

By Tomé Amado Juñu 17, 2019 967
Presidente Parlamentu Nasional Presidente Parlamentu Nasional

DILI: Tinan ida ona, Arão Noe assume kargu nu’udar Prezidente Parlamentu Nasionál no bainhira iha avaliasaun dezempeñu konklui katak mosu failansu barak iha ninia lideransa, nia prontu atu tuun husi kadeira aas liu iha uma fukun ne’e.

Prezidente PN Arão Noe deklara kestaun ne’e liu husi ninia diskursu iha serimonia abertura Konfrensia Nasioal Aliansa Mudansa ba Progresu (AMP) ho tema “Konsolida AMP hodi Serbi Di’ak Liu Tan Povu” ne’ebé realiza iha Otel Golgota, Rai-kotu, Dili. Konferensia ne’e rasik hala’o durante loron rua, Sabadu (15/06) no Domingu (16/06).

Arão agradese ba lideransa masimu partidu CNRT, PLP no KHUNTO ne’ebé fó ona konfiansa ba nia atu lidera PN.

Nia dehan, iha 13 Juñu 2019 nia kompleta ona tinan ida assume kargu nu’udar Prezidente Parlamentu Nasional, tan ne’e karik iha avaliasaun dezempeñu hamosu konkluzaun katak nia lideransa failansu barak, nia prontu atu tuun.

“Ha’u hatene ha’u-nia kapasidade umanu laiha maibé tanba de’it konfiansa ha’u simu hodi hala’o. Se iha failansu ruma mak ha’u halo durante ne’e bele halo kritika liu husi avaliasaun ne’e,” dehan Arão, Sabadu (15/06).

Tan ne’e, Arão afirma, bainhira iha avaliasaun ne’e mak konklui katak nia serbisu la di’ak no hakarak atu hapara nia husi kargu Prezidente PN, Arão simu ho liman rua.

Tuir Arão avaliasaun ne’ebé hala’o iha Konferensia AMP ne’e importante atu nune’e membru governu no deputadu AMP sira bele hatene didiak idaidak nia knar ho loloos.

“Atu nune’e ba oin bele serbisu di’ak liu tan hodi tulun no apoiu VIII Governu atinze planu no programa ba tinan haat ne’e ho di’ak liu tan,” katak nia.

Rate this item
(0 votes)

Independente Digital TV