×

Atenção

JUser: :_load: Não foi possível carregar usuário com ID: 428

JUser: :_load: Não foi possível carregar usuário com ID: 430

Alkatiri: “So Maromak mak Bele Hapara Lu-Olo husi Prezidente FRETILIN” Featured

By INDEPENDENTE Maiu 08, 2017 9592
Lu-Olo Lu-Olo

DILI: Prezidente Repúblika Eleitu, Francisco Guterres ‘Lu-Olo’ ne’ebé iha 20 Maiu, sei simu pose hodi hala’o knar nudar Xefe Estadu deklara sei la rezigna an husi nia kargu nudar Prezidente Partidu FRETILIN.

Lu-Olo hatete, nia eleitu nudar Prezidente Repúblika tanba Partidu FRETILIN, tan ne’e nia sei la haketak an husi partidu ne’e.

Atual Prezidente Partidu FRETILIN ne’e hato’o kestaun ne’e relasiona ho hanoin balun ne’ebé mosu hodi husu nia atu rezigna an husi nia kargu nudar Prezidente Partidu.

“Ha’u la hakfodak tanba hatene saida mak Konstituisaun (RDTL) hatete, lei sira hatete, ninia intrepretasaun buat sira ne’e oinsa pelumenus ita hatene. Iha intensaun seluk, Lu-Olo tenke haketak husi ninia partidu, agora ha’u mai husi ne’eba, haketak halo nusa? Problema ida ne’e. Mais labuat ida, ida ne’e buat foun ida mak mosu, entaun iha intrepretasaun mosu oioin kona-ba Prezidente Repúblika,” deklara Lu-Olo liu husi ninia diskursu iha Konferensia Nasionál Partidu FRETILIN iha Salaun Delta Nova Komoro-Dili, Sabadu (06/05). 

Tan ne’e, Lu-Olo dehan, nia sei la hakfodak ho opiniaun husi públiku ka orgaun balun hato’o.

“Ha’u, Lu-Olo, la hakfodak ida, tanba ha’u hatene ha’u nia an bainhira mak ha’u sai  Prezidente (Repúblika) ba povu tomak nia serbisu, bainhira mak ha’u sei relasaun nafatin ho ha’u-nia partidu rasik. Ne’ebé ida ne’e ba ha’u normal hela,” katak nia.

Iha fatin hanesan, Sekretariu Jeral partidu, Mari Alkatiri hatete, Lu-Olo eleitu ona sai Prezidente Repúblika maibé nia sei la rezigna an husi Prezidente Partidu tanba nia kandidata an husi partidu rasik, tan ne’e laiha lojika politika bainhira nia tenke sai husi kargu Prezidente partidu.

Tuir Alkatiri, nudar Prezidente Repúblika Lu-OLo sei sai Prezidente ba povu tomak, maibé hakarak ka lakohi  nia tenke sai nafatin Prezidente partidu hodi sai Prezidente ba militante no sipatijante FRETILIN nian.

Tan ne’e, Alkatiri afirma, laiha dalan ba Lu-Olo atu rezigna an husi nia kargu nudar Prezidente Partidu FRETILIN.

“Ema sira ne’ebé mai husi independente karik uza tinan lima ne’e tama sai suku hodi harii partidu, nusa mak Lu-Olo mai husi partidu tenke rezigna an, sai husi Prezidente Partidu FRETILIN?”, Alkatiri kestiona.

Nia afirma, kargu nudar Prezidente no Sekretariu Jeral Partidu ne’ebé nia ho Lu-Olo assume mai husi eleisaun direta, tan ne’e sira na’in rua sei assume kargu ne’e to’o sira-nia mandate remata.

“Ami na’in rua eleitu hamutuk, nia (Lu-Olo) Prezidente (partidu), ha’u Sekretariu Jeral partidu FRETILIN. Ema ida sei la hasai ami, so Maromak mak bele hapara ami, diabu mós labele hapara ami. Kuandu Maromak fó nafatin forsa mai ami nain rua, ami kontinua lidera partidu FRETILIN,” deklara Alaktiri.

Nudar Xefe Estadu, Alkatiri dehan, Lu-Olo sei serbisu tuir Kostituisaun RDTL haruka, sei kuida ho responsabilidade kargu ne’ebé povu atribui ba nia.

Nia hatutan, Xefe Estadu la’os atu ba halo politika partidu nian maibé ba iha ne’eba atu halo politika ba interese estadu nian.

“Nia (Lu-Olo) sai ona Xefe Estadu, tanba ne’e sei la halo serbisu partidu nian hodi halo kampaña eleitoral iha fatin-fatin, maibé nia sei fó nafatin orientasaun politika ba nia Vise Prezidente partidu na’in rua atu hala’o servbsu partidu nian, inklui mós mai ha’u hanesan Sekretariu Jeral Partidu atu nune’e bele organiza kuadru hotu par hala’o serbisu hodi lori vitoria ba FRETILIN,” katak Alkatiri.

Rate this item
(0 votes)

Independente Digital TV