Print this page
Kontentor Kontentor

Alfándega Konsidera Konteiner Rua Tama Kategoria Risku Featured

DILI: Konteiner rua ne’ebé Alfándega servisu hamutuk ho Polisia Sientífiku Investigasaun Kriminál (PSIK) sita iha portu Dili foin lalais ne’e tama iha jestaun kategoria risku Alfándega nian.

Tuir dokumentu ne’ebé Alfándega simu, konteiner rua ne’e tula adubu, maibé depois verifika fali identifika materiál esplozaun. Tanba sasán hirak ne’e bele produs fali hodi halo bomba ikan.

Diretór Jerál Alfándega, José António Fátima Belo hateten, iha loron 26 Fevereiru 2018, sira sobu ona konteiner rua ne’ebé deskonfia produtu ilegál.

Nia esplika, importasaun konteiner rua ne’e tama iha jestaun risku alfándega nian, entaun sira halo analiza ba dokumentu ne’e haree katak materiál sira ne’e iha potensiál atu halo esplozaun.

“Atu evita buat ne'ebé monu ba iha ema ne'ebé laiha responsabilidade, ami haruka karta ida ba PSIK halo akompañamentu hodi halo teste ba materiál sira ne’e”, dehan nia, iha servisu fatin, Palásiu Governu, horisehik.

Tuir nia, sira halo akordu hodi sobu konteiner ne’e, depois PSIK hasai duni nia amostra hodi halo teste. Konteiner sira ne’e halo auto entrega ba PSIK hodi hein prosesu investigasaun tuir mai.

José dehan, atu hatama adubu tenke hetan autorizasaun husi Ministériu Agrikultura no Peska (MAP). Kuandu ai-moruk tenke hetan autorizasaun husi Ministériu Saúde (MS). Rekizitu sira ne’e mak tenke prienxe.

Maibé, tuir Alfándega, materiál sira ne’e iha potensiál bele halo fali buat seluk. Tanba ne’e, servisu hamutuk ho instituisaun sira seluk hodi halo aprensaun no investigasaun.

Antes ne’e, PSIK prende konteiner rua ne'ebé deskonfia tula materiál prima Ammonium Nitrate Phosphate (ANP). Sasán sira ne’e poténsia ba produsaun bomba hodi utiliza atu hamate ikan iha tasi.

Iha aprensaun ne’e PSIK mós kaptura suspeitu na’in tolu inklui timoroan ida hodi prosesu tuir lei.

Materiál prima ne’e importa husi kompañia Elon Pasífiku, husi nasaun Xina parseria ho kompañia timoroan balun. Sasán hirak ne’e tama ona postu Dili iha semana rua liubá ho ró naran ANN.

Sasán sira ne’e ninia alvu mai duni Timor para atu produs hodi fa’an fali ba peskadór sira.

Sasán hirak ne’e sei fó impaktu negativu ba ikan no ahu-ruin sira iha tasi laran, PSIK liu husi ninia ekipa intelijen deteta konteiner rua ne’e no ikus mai halo buska aprensaun.

Entretantu, PSIK mós kaptura sidadaun na’in tolu, rua husi estranjeiru no ida timoroan. Suspeitu sira detein ona PSIC durante oras 72 molok aprezenta ba interrogatóriu dahuluk.

Iha portu Dili, suspeitu ida ho naran Key husi Malázia hateten, konteiner rua ne’e iha ona portu Dili semana rua. Maibé, nia prosesu mak tarde to’o hetan buska husi Polisia.

Nia rekoñese sasán sira ne’e sei produs fali ba instalasaun bomba para atu tuda ba ikan sira bainhira halo peska.

Portantu husi buska ne'ebé PSIK halo ba konteiner rua ne’e maizumenus iha tuku 11:00 meiudia, iha loron Segunda, 26 Fevereiru 2018. 

Read 397 times Last modified on Kinta, 08 Marsu 2018 14:31
Rate this item
(0 votes)

About Author

Latest from Ligia Noronha

Related items