Ai Monu iha Bekora, Hanehan Mikrolete 2, Motor 4 Featured

By Domingos Gomes Setembru 16, 2020 1235
Ai monu hanehan karreta iha Becora Dili, tersa (15/9). Foto INDEPENDENTE Ai monu hanehan karreta iha Becora Dili, tersa (15/9). Foto INDEPENDENTE

DILI: Dezastre mosu iha area terminal Bekora, Dili. Ai amare huun boot ne’ebé hamriik iha estrada ibun monu no hanehan mikrolete rua no motor haat. Sorte boot tanba dezastre ne’e rezulta de’it ema ida ain tohar no la rezulta ema lakon vida.

Iha Tersa (15/09) maizumenus tuku 17.30 oras Timor-Leste, komunidade ne’ebé besik iha area terminal Bekora hakfodak ho ai amare ne’ebé monu.

Sorte at ba mikrolete 02 ne’ebé para hela iha estrada ibun hodi hein pasajeiru, tanba ai-huun boot ne’ebé derepente monu ne’e hanehan mikrolete rua. Motor haat, rua husi diresaun Dili ba Fatu-ahi no rua seluk husi diresaun Fatu Ahi mai Dili, mós la konsege sees husi dezastre ne’e.

Mane ida ne’ebé kondus motor hetan sorte at liu tanba ai sanak monu hanehan nia ain parte loos no rezulta nia ain tohar.

Hafoin akontesimentu ne’e, komunidade sira ajuda hasai vitima ne’ebá ain tohar hodi lori ba tratamentu iha ospital.

Kondutór mikrolete 02, José João Guterres hatete, nia tula pasajeiru na’in 6 husi diresaun Kuluhun mai tuun besik ponte, no hafoin pasajeiru sira tuun hotu liu menutu balun nia laran ai monu no hanehan kareta.

Sorte boot, tanba maske ai monu hanehan mikrolete ne’e, maibé kondutór ne’e la hetan kanek.

Entretantu, mikrolete 02 ne’ebé ai monu hanehan mak mikrolete ho naran Cejane Baty ho xapa matrikula 31-160 TL, no Neffla ho xapa matrikula 34-355 TL.

Hafoin dezastre ne’e parte bombeirus tuun kedan ba fatin akontesimentu hodi tesi ai no hamoos dalan atu movimentu transporte públiku bele la’o normal fila fali.

Rate this item
(0 votes)

Independente Digital TV