Print this page

Mandatu Alkatiri Remata, Taur Kria Ekipa Tranzisaun

By INDEPENDENTE Jullu 30, 2019 4010
PM Taur ho Alkatiri. Foto INDEPENDENTE PM Taur ho Alkatiri. Foto INDEPENDENTE

DILI: Iha 31 Jullu, aban, mandate atual Prezidente Autoridade Rejiaun Administrativa Espesial Oekusse Ambeno (RAEOA) Mari Alkatiri sei remata. Maibé to’o ohin loron governu seidauk fihir figura foun atu troka.

Primeiru Ministru Taur Matan Ruak hatete, prosesu tranzisaun ba RAEOA la’o hela no governu sei kria komisaun tranzisaun ida hodi halo preparasaun ba prosesu tranzisaun.

“… kria komisaun tranzisaun ne’ebé lidera husi Eng. Helder (Lopes) atu hatene uluk saida mak iha RAEOA no oinsa nia prosesu tranzisaun, tanba ne’e ekipa tranzisaun sei kontaktu ba RAEOA hodi halo prosesu tranferensia,” deklara PM Taur hafoin hasoru-malu ho Prezidente Repúblika Francisco Guterres Lu Olo iha Palasiu Prezidensial Bairro-pite, Segudan (29/07).

PM Taur dehan, tuir Lei bainhira Prezidente Autoridade RAEOA nia mandatu remata, ema daruak iha RAEOA bele lidera durante loron 120 nia laran.

“Iha lei mós hatete karik mandatu hotu sei iha tan vagatura ba loron 120 hodi segundu homem iha ne’eba bele lidera,” dehan PM Taur.

Iha fatin ketak, Prezidente Parlamentu Nasional Arão Noe de Jesus Amaral hatete, to’o ohin loron nia parte seidauk simu informasaun kona-ba kandidatu foun ba Prezidente Autoridade RAEOA.

“Ami sedauk simu informasaun kona-ba mandatu foun Prezindente RAEOA-ZEESM tanba desizaun governu nian, karik iha desizaun ona parlamentu informadu maibé sedauk iha,” dehan nia.

Nia dehan, desizaun governu nian depedente ba sujestaun no opiniaun ba karta ne’ebé atual Prezidente Autoridade RAEOA aprezenta ba governu. Hanesan públiku hatene, foin lalais ne’e Mari Alkatiri haruka ona karta ba PM Taur no PR Lu Olo hodi hatete katak nia lakohi ona atu kontinua mandatu iha RAEOA.

“Governu sei foti desizaun ida justu, sei indika subtitui ema ida ho kapasidade di’ak ba kontinua programa sira ne’e,” dehan Arão.

Mandatu Presidente RAEOA-ZEESM durante tinan lima. Hetan posse iha tinaan 2015 no sei remata iha loron aban, 31 fulan-Jullu tinan ne’e (2019).

Tuir estatutu RAEOA, artigu 20 alinea 1, hateten bainhira Presidente RAEOA labele ha’ao ona nia knaar durante tempu badak, membru seluk husi autoridade bele simu knaar ne’e tuir presedénsia.

Iha artigu 20 alinea 2, hateten karik fatin Presidente Autoridade mamuk, president autoridde tenki hetan nomeasaun loron 120, tuir arrtigu 19 alinea 1.

Artigu 20 alinea 3, hateten bainhira ema ezerse knaar Presidente Autoridade laiha, funsaun hirak ne’e sei hala’o interinamente tuir alinea 1 haruka, no informasaun kona-ba ida ne’e tenki too Primeiru Ministru hodi aprova.

Iha artigu 19 alinea 1, hateten Presidente Autoridade tenki timoroan, tenki iha idade liu 35, tenki hetan noemasaun husi Presidente Repúblika, tuir proposta husi Primeiru Ministru, no hetan mandate tinan lima, ne’ebé bele prolonga tan tutuir malu.

Estatutu REAOA-ZEESM hetan ona alterasaun husi Parlamentu Nasionál. Dokumentus alterasaun oras ne’e iha ona Gabinete Presidente Repúblika hodi hein desizaun final.

Rate this item
(0 votes)
Last modified on Kinta, 01 Agostu 2019 11:52