“Kuandu ita haree ba objetivu estadu, objetivu dezenvolvimentu nasionál, katak atu halo povu ida ne’e moris ho dignu no povu nia bens-star ne’e tenke la’o di’ak. Membru parlamentu nasionál nu’udar reprezentante povu nian luta ba povu nia moris di’ak uluk, depois mak sira moris di’ak,” dehan Julio.

Maibé realidade, nia hatutan, buat ne’ebé deputadu sira hatudu dezde primeiru lejistura to’o ohin loron, sempre trata uluk mak sira-nia moris di’ak.

“Agora daudaun sira deside tan atu halo uma ba sira, maibé iha parte seluk povu moris terus ba bebeik,” dehan nia.

Nia hatete, loloos deputadu sira tenke tau buat ne’ebé mak prioridade ba povu la’os tau uluk ida ne’ebé la prioridade.

“Foin daudauk sira deside hola karreta luxu ba sira, ha’u haree hanesan moris iha Timor ne’e, ida goza liu mak membru parlamentu sira ona,” katak nia.

Bazeia ba informasaun ne'ebe spailla iha media sosial katak tuir resolusaun PN no. 2/2008, Segunda Legislatura sobre atribuisaun regalia ba deputadus, maka kada deputadu hetan subsidiu kada fulan $450 ba alojamentu,  $4,000 kada tinan ba tratamentu saúde, lista prezensa kada loron $10, saldo telephone kada fulan $300, kombustivel kada fulan $400, subsidiu resesu kada tinan $2,000.

Aliende ne’e, reprezentante povu iha Parlamentu Nasionál, simu salariu boot kuaze $3.000 kada fulan, simu karreta, no seluk tan.