Portavoz FMTL, Novelino dos Santos informa, iha Domingu (26/07) liu husi reuniaun entre FMTL ho senadu universitariu sira no reprezentante sosiadade sivil sira, deside ona atu halo manifestasaun kontra MJ Carceres ‘U’.

Tuir planu, nia hatutan, iha 27 Jullu, FMTL sei hato’o karta koñesimentu ba PNTL kona-ba asaun pasifiku ne’ebé sei hala’o iha 3 Agostu 2020.

“Ami deside ohin katak, karta ne’ebé ami prepara ona atu fó koñesimentu ba PNTL (katak) iha dia 3 (Agostu), iha Segunda-feira, ita sei halo asaun pasifika hodi hasoru Esbosu Lei Kriminalia Difamasaun ne’e,” informa Portavoz FMTL ne’e ba jornalista INDEPENDENTE hafoin reuniaun iha salaun Asosiasaun HAK, Domingu (26/07).

Nia hatete, iha Segunda (27/07), nia parte sei hato’o karta koñesimentu ba PNTL no sei hein audensia ho PNTL, hodi diskuti no antisipa parte balun infiltra iha asaun ne’ebé sei hala’o iha 3 Agostu.

“Ida ne’e (3 Agostu) hanesan data tentativa ida, maibé inprinsipiu atu hatete de’it katak preparasaun ida ohin husi Front Mahasiwa Timor Leste prepara kondisaun ba enkontru preparasaun asaun pasifika iha tempu badak, no ohin ita mós konvida entidades hotu-hotu hanesan, Assosiasaun Jornalista Timor-Leste no sosiedade sivil sira ne’ebé mak la aseita ho esbosu Lei Kriminalia Difamasaun.”

“Sira-nia partisipasaun masimu tebtebes. Ohin, ita mós fahe ona serbisu ba seksaun tekniku ninian hanesan divijaun, logistika, seguransa, koordenador kampu no portavoz hodi halo preparasaun ida mais efetivu liu,” nia dehan.

Nia informa, iha enkontru refere, kuaze sosiadade sivil sira marka prezensa no tuir planu sira sei halo mós karta hodi fó apoiu ba no kontribui mós material ne’ebé presiza durante asaun pasifiku.

Aleinde ne’e, nia dehan, iha mós reprezentante senadu jeral husi universidade hotu-hotu ne’ebé deklara prontu atu mobiliza estudante universitariu sira partisipa iha asaun refere.

Atu bele hetan apoiu barak liu tan, Novelino dehan, hahú ohin, nia parte sei marka audensia ho instituisaun sira ne’ebé mak durante ne’e kontra esbosu kriminaliza difamasaun, no sei haruka mós karta ba lider relijiozu sira hodi husu tempu atu bele hasoru-malu.

“Agora daudaun karta ami prepara ona iha ne’e, no ami sei submete lalais atu nune’e iha tempu badak ami bele hasoru lalais lideransa masimu husi parte Igreja sira nian, nune’e bele halo enkontru ho sira hodi husu mós apoiu forsa popular husi sira, atu bele apoiu, tantu husi relijiaun Katolika, Musulmanu no Protestante sira, ita sei konvida hotu,” dehan nia.

Inprinsipiu, nia dehan, luta ida ne’e nu’udar luta koletivu, tan ne’e see de’it ne’ebé kontra esbosu lei kriminaliza difamasaun bele hola parte.

“Atu lusifer, diabu nia boot mak atu mai hakarak hamutuk ho FMTL hodi luta kontra lei ne’e mós konta hotu husi ita-nia ema ne’ebé hamriik iha ita-nia fileira,” dehan nia.

Aleinde ne’e, nia dehan tan, FMTL mós sei halo karta koñesimentu ba autoridade suku hotu-hotu iha Dili laran tomak hodi husu mós sira-nia apoiu no fó orientasaun diretamente hodi dirije populasaun sira atu tuun iha asaun passifiku ne’e.

“Kuaze iha teritoriu laran tomak ema hotu reklama no la aseita ho esbosu lei ne’e. Sira ne’ebé la konkorda sira mós sei halo asaun iha sira-nia munisipiu ho meiu demostrasaun ne’ebé sira halo iha komunikasaun sosial hanesan FB, WA no seluk tan iha tempu hanesan, no ami fiar katak baihira ami tuun ba kampu, sosiedade iha Dili laran tomak sei tuun,” dehan nia.

Nia hatutan, assosiasaun no movimentu sira iha munisipiu mós hetan ona kordenasaun husi FMTL no hahú ona sira-nia kampaña ba komunidade sira hodi afirma sira-nia pozisaun kontra ba esbosu lei ne’e.

Entretantu, tuir observasaun jornalista Jornal INDEPENDENTE, Sosiedade Sivil sira hanesan AJAR no HAK hakerek ona spanduk ne’ebe tara iha idaidak ninia edifisiu.

Iha portaun tama ba edifisiu HAK tara hela spanduk rua ne’ebé hakarek “Asosiasaun HAK Kontra Totalmente Exbosu Lei Difamasaun, tanba Exbosu Lei ne’e Kontra Produtivu ho Konstituisaun da Republika” no “Assosiasaun HAK Kontra Totalmente Exbossu Lei Difamasaun tanba sei Hamate Espiritu Estadu Demokratiku”.

Entretantu, iha portaun edifisiu AJAR tara hela spanduk rua ne’ebé hakerek “Abaixu Lei Kriminalija Difamasaun” no “Abaixu Borjuista no Ukun Ditadura”.