Kuarta, 24 Outubru 2018 | Login
Ratifikasaun Tratadu FM sei Hein Xanana

Ratifikasaun Tratadu FM sei Hein Xanana Featured

DILI: Parlamentu Nasionál prontu ona atu halo ratifikasaun ba akordu Fronteira Marítima entre Timor-Leste no Austrália, maibé sei hein hela informasaun husi Xefe Negosiadór Fronteira Marítima, Kay Rala Xanana Gusmão.

Delimitasaun Fronteira Marítima entre Timor-Leste no Austrália, iha 6 Marsu 2018, hakotu liu husi asina akordu iha Asembleia Jerál ONU nian. Hela de’it ona Fronteira Marítima Entre Timor-Leste no Repúblika Indonézia iha segmentu rua Kupang no Ambon maka seidauk remata.

Prezidente Bankada Partidu CNRT, Duarte Nunes hatete, kuandu Estadu Timor ho Indonézia define loloos ona fronteira tasi iha parte rua ne’e, Parlamentu Nasionál bele halo ona ratifikasaun ba asuntu ne’e.

Governu no Parlamentu Nasionál agora ne’e hein hela informasaun husi Xefe Negosiadór Prinsipál, Xanana Gusmão, kuandu informa katak negosiasaun Fronteira Marítima ho Indonézia remata ona no bolu governu ba asina, Parlamentu mós sei ratifika tratadu ne’e.

“Tratadu Fronteira Marítima Timor-Leste ho Austrália ne’e buat hotu preparadu ona hein ratifika de’it, maibé sei hein informasaun husi Maun Boot Kay Rala Xanana Gusmão, tanba nia mak uluk hanesan Xefe negosiadór”, dehan nia, iha Uma Fukun PN, foin lalais ne’e.

Nia hatete, tuir informasaun katak tratadu Fronteira Marítima Timor ho Indonézia ne’e sei asina iha Outubru ne’e nia laran, kuandu remata bele halo ratifikasaun.

Read 189 times
Rate this item
(0 votes)