Tersa, 18 Juñu 2019 | Login
Iha Loron Restaurasaun 20 de Maiu 2019 Iha Loron Restaurasaun 20 de Maiu 2019

Puizia Borja da Costa iha Palásiu Prezidensial Featured

Kadalak suli mutuk fila ué inan

Ué inan tan malu sá ben ta’han!

Kdadalak suli mutuk fila ué inan,

Timoroan hamutuk tane ita rain.

“Tebes duni! Bainhira ita hamutuk, ho prinsípius justus, la iha sátan ida bele sátan ita atu lao ba oin”, lia-fuan nwe’ebé sai husi Prezidente Repúblika Francisco Guterres Lu Olo nia ibun hafoin lee sai puizia husi poeta mártir, Francisco Borja da Costa.

Puizia ne’e hanesan sai nu’udar ‘rezumu’ kiik husi diskursu naruk PR Lu Olo nian ne’ebé nia hato’o iha loron restaurasaun independensia ba tinan 17 iha Palasiu Prezidente Nicolau Lobato, Bairro-pite, Dili, Segunda (20/05).

Iha ninia diskursu, PR Lu Olo apela ba povu Timor Leste tomak atu kria pas, hametin unidade, no garante estabilidade hodi bele alkansa objetivu dezenvolvimentu.

Iha selebrasaun 20 Maiu ba tinan ida ne’e ho tema “Haforsa Unidade no Garante Estabilidade atu hala’o Dezenvolvimentu Nasionál”, PR Lu Olo fó hanoin katak atu hala’o dezenvolvimentu tenke iha dame. Dezafiu ne’e ezije unidade.

Tanba, nia hatutan, ho pás no estabilidade mak bele hala’o dezenvolvimentu ida ne’ebé halibur ema hotu atu bele lao ba oin ho susesu.  Pás no dezenvolvimentu labele lao ketatketak.

“Tebes duni katak ita tenke hametin unidade, hodi garante estabilidade no haburas ita-nia rain ba beibeik”.

Maibé, PR dehan, unidade ida ne’e tenke hatuur ho regras, prinsípius no valores. Unidade hametin ho prinsípiu inkluzaun katak la hasees ema ida. Tamba maturidade ita-nia Povu nian, maka ohin ita iha estabilidade.

“Ha’u aproveita biban ida ne’e atu agradese papel Forsa Defeza no Seguransa nian hodi garante autoridade Estadu no estabilidade ba ita-nia rain”.

“Ho estabilidade deit maka ita bele lori dezenvolvimentu ba oin no babeibeik,” dehan Lu Olo.

Tuir Lu Olo, 20 Maiu 2002 akontese tanba Timor-oan rasik hatene haburas konxiénsia nasionál ne’ebé hahú husi grupu nasionalista kiik ida, ne’ebé saudozu Prezidente Nicolau Lobato mak lidera informalmente, molok rejime Salazar monu, iha 25 Abril 1974, iha Portugal.

Konxiénsia nasionál mosu tanba grupu kiik ne’e konsege haree katak Timor-oan iha patrimóniu kulturál boot ne’ebé dada hamutuk. Haree mós katak Timor-oan, iha identidade rasik no iha matenek kbiit atu bele ukun rasik-an.

“Sira haree mós ba ita-nia beiala sira-nia istória hasoru kolonializmu iha reinu ida-idak. Neineik, neineik, sentimentu katak ita pertense ba moris fatin ida de’it, hakotu fronteira entre reinu sira, entre rasa, entre mane no feto, entre liurai no átan, entre fiar-nain husi relijiaun oioin, entre loro sa’e no loro monu”.

Ohin loron, Lu Olo hatete, bele dehan katak identidade ida ne’e mak halo hotu-hotu orgullu-an nafatin, nu’udar timoroan, moris iha uma kain ida de’it: ita-nia Pátria Timor Leste.

 

Kondekora Veteranus

Iha selebrasaun 20 Maiu tinan ida ne’e, Prezidente Repúblika, ho Estadu Timor-Leste nia naran, deside rekoñese no valoriza veteranu 10 ho Kolar Orden Timor Leste no 15 ho Medalla Orden Timor Leste, ba sira-nia dedikasaun exkluziva ba ita-nia luta Libertasaun Nasionál.

PR Lu Olo dehan, veteranu sira ne’e husik buat hotu-hotu. Sira husik sira-nia uma, sira-nia bein-estar no sira-nia família,  hodi hako’ak mehi koletivu ida. Família-sira simu sira-nia sakrifísiu ho ksolok no domin. 

“Infelizmente, husi lista 25 ne’e, na’in 15 mak labele hatutan misaun boot veteranu sira-nian, iha tempu ukun-an ne’e: kore Povu husi kiak no mukit. Tamba sira mate ona!,” dehan nia.

Veteranu sira ne'ebé hetan kondekorasaun mak: José Agustinho Sequera "Somotxo", Orlando Jerónimo da Costa, João Cabral, António da Costa, Lorenço da Silva Freitas, Armando Viegas, Saudozu Reinaldo Freitas Belo, Saudozu Afonso Henrique Monteiro, Saudozu Venancio Ramos Amaral Bras, Saudozu Virgilio dos Anjus, saudozu Felisberto Maria dos Santos, saudoza Etelvina Fernandes Belo, saudozu José Alvano Maria da Costa, saudozu Diogo Bonaparte Soares, saudozu Januário Xavier, saudozu Filomeno da Silva, saudozu Roberto da Neves, saudoza Rosa de Zinha Xavier, saudozu Cesário Ximenes, saudozzu Domingos Pinto, no saudozu Agustinho Sarmento.

Read 261 times
Rate this item
(0 votes)