Sexta, 20 Outubru 2017 | Login
Karreta Deputadu Parlamentu Nasional Karreta Deputadu Parlamentu Nasional

Leilaun Karreta Prado Ba Deputadu Hanesan Prátika Korrupsaun Featured

DILI: Desizaun Parlamentu Nasionál (PN) hodi halo leilaun karreta Prado PN nu’udar hahalok prátika hanesan korrupsaun.

Diretór La’o Hamutuk (LH), Juvinal Dias, haree katak PN halo polítika halo lei rasik hodi fasilita leilaun karreta Prado ba deputadu sira nu’udar forma korrupsaun ida.

“Ne’e ami konsidera katak deputadu sira uza nia-podér lei hodi fasilita sira atu halo leilaun ba sira. Ne’e tipu ba korrupsaun”, dehan nia, iha servisu fatin, Bebora-Dili, horisehik.

Nia hatutan, PN nia funsaun la'ós halo leilaun karreta, maibé atu asegura polítika Estadu la’o ho di'ak, halo balansu ba polítika, lei no fasilita direitu povu nian atu aloka orsamentu ba infraestrutura sira.

Leilaun ida ne’e hatudu momoos katak deputadu sira la konsege evita hanesan sira nia-kaan (kerakusan) ba patrimóniu Estadu ba sira-nia privadu.

Nia mós kestiona tan katak, deputadu sira falla mós atu evita buat ida konflitu ba interese hodi halakon Estadu.

“Ami nia preokupa kona-ba karreta balun ne’ebé sei utiliza, di'ak liu la presiza atu halo leilaun”, tenik Juvinal.

Tuir nia, la lójika bainhira halo leilaun karreta hodi sosa karreta foun. Kuandu PN iha hanoin tenke uza karreta foun, entaun karreta tuan sira bele entrega ba ospitál tanba sira presiza karreta barak hodi fasilita pasiente sira.

Nia dehan, deputadu sira la’ós ema vulneravel, povu sira iha área remota maka vulneravel liu, entaun di'ak liu entrega karreta sira ne’e ba iha suku sira, liuliu sentru saúde sira atu bele uza hodi halo akompañamentu ba povu sira.

Antes ne’e, diáriu ne’e publika ona katak, reuniaun lider bankada parlamentár ne’ebé envolve partidu FRETILIN, CNRT, PD no Frente Mudansa, deside ona hodi sosa tan karreta foun 65 ba deputadu foun sira ne’ebé atu ba tuur iha Uma Fukun.

Tuir planu, Konsellu Administrasaun Parlamentu Nasionál ne’ebé kompostu husi bankada haat ne’e prezerva ona osan ho presu US$ 34.000 kada Prado unidade ida. Ne’e duni, husi totál karreta 65 ne’ebé atu sosa Parlamentu Nasionál tenke hasai osan hamutuk tokon $2.79.

Nune’e, ba karreta hirak ne’ebé agora daudaun deputadu sira uza sei leilaun, tanba pareser husi istolójiku sira katak karreta sira ne’e barak laiha ona kondisaun atu bele kontinua utiliza ba servisu deputadu foun. Nune’e, kustu ba manutensaun mós boot.

Iha períodu tinan 2012 karreta Prado nia folin rihun $63, iha períodu ida ne’e ninia kustu hatún fali ba rihun $43. Karreta ne’e ninia marka hanesan, maibé espesifikasaun mak diferente.

Alende ne’e, negosiasaun ne'ebé parte Konsellu Administrasaun PN halo ho CNA, tuir planu iha loron 120 nia laran sei to’o iha Timor hodi entrega ba membru deputadu foun sira ne'ebé atu mai.

 

Read 365 times
Rate this item
(0 votes)
  • MidAd1
  • Heineken Klaran
AdBottom1