Sábadu, 16 Dezembru 2017 | Login
Palacio Governu Palacio Governu

Governu Prioritiza Infraestrutura Báziku Featured

DILI: Programa VII Governu nian ne’ebé aprezenta ba Parlamentu Nasionál sei foka liu ba área prioridade infraestrutura báziku sira, ne’ebé esensiál liu ba povu nia moris.

Ministru Prezidensiál Konsellu Ministru, Adriano Nascimento hatete, programa VII Governu aprezenta ona ba Parlamentu Nasionál atu meza bele hatún ba bankada no komisaun hodi deputadu sira bele fó apresiasaun ba programa ne’e.

“Infraestrutura bázika mak importante liu hanesan saúde, edukasaun no agrikultura”, dehan nia, hafoin entrega programa ba Prezidente Parlamentu Nasionál, horisehik.

Ministru ne’e hatutan atu klarifika programa VII Governu ho di'ak liu, ne’e so Primeiru Ministru mak bele halo. Maibé rezumu programa importante sira mak hanesan nesesidade bázika povu nian.

Iha fatin hanesan, portavós Prezidente Parlamentu Nasionál, Deputada Lídia Belo hatete, Parlamentu Nasionál iha ona giaun ba diskusaun programa VII Governu nian durante iha loron lima.

Ne’e duni, meza sei despaxa ba deputadu sira hodi estuda atu iha loron 16 to’o 21 Outubru bele halo diskusaun iha plenária ho governante sira.

Iha fatin hanesan, parte Bloku Opozisaun Parlamentár (BOP) husi bankada KHUNTO, Luis Roberto hatete, programa VII Governu aprezenta ona maibé seidauk lee. Tanba ne’e, sei presiza tempu hodi lee no analiza.

Nia hatutan, bloku opozisaun nia pozisaun ba programa ne’e presiza tetu ida ba ida atu bele fó pareser ba Governu.

Nia hatutan, kona-ba vota afavór ka kontra depende ba programa. Kuandu fó duni benefísiu ba povu no nasaun, nu’udar sidadaun sei konsidera maibé kuandu laiha sei foti kartaun mean.

Nune’e, Prezidente Bankada Partidu Libertasaun Populár (PLP), Fidelis Magalhães hatete, programa ne'ebé VII Governu aprezenta bankada sei halo diskusaun kle'an.

Aleinde ne’e, bloku opozisaun sei kontaktu malu hodi haree ba programa atu bele sai forsa ida hodi asume nia pozisaun hanesan partidu opozisaun.

“Kona-ba pozisaun ba programa ne’e ami seidauk haree, ne'ebé ami labele halo espekulasaun”, dehan nia.

Entretantu, Prezidente Bankada FRETILIN, Francisco Miranda Branco hateten, seidauk lee programa ne’e, maibé otimista sei pasa iha plenária tanba hotu-hotu iha objetivu hakarak hadi'a povu nia moris.

Nia hatutan, natureza polítika iha nasaun ida mak la’o, nune’e biar partidu ketak-ketak, maibé hanesan sidadaun iha sentidu Estadu atu bele kontribui ba dezenvolvimentu nasionál iha nasaun ne’e.

Read 294 times
Rate this item
(0 votes)
  • MidAd1
  • Heineken Klaran
AdBottom1