Sexta, 27 Abril 2018 | Login
Ministru Rui Gomes Ministru Rui Gomes

Governu Aprova Osan Duadesimu Tokon $ 114 Featured

DILI: Governu husi Ministériu Planu Finansas revé ona orsamentu duadesimu ho montante tokon $114, ne’ebé sei uza durante fulan Janeiru no Fevereiru.

Maski prezerva ba fulan rua nian, maibé Governu iha planu sei halo poupansa hodi bele utiliza orsamentu to’o fulan haat.

Ministru Estadu no Planu Finansas, Rui Gomes, hatete orsamentu duadesimu ne’e restu husi Orsamentu Jerál Estadu (OJE) 2017 nian ne’ebé fahe ba fundu kapitál menór hodi utiliza ba fulan rua nia laran.

Nia dehan, orsamentu ne’e uza ba saláriu e vensimentu, Bens e Servisu, transferénsia publika no kapitál dezenvolvimentu.

Governante ne’e hateten, osan duadesimu mós sei halo pagamentu ba funsionáriu kontratadu sira ne’ebé Governu halo kontratu ho sira.

Maibé, orsamentu ne’e Governu sei rezerva verba balun, nune’e bainhira Prezidente Repúblika foti desizaun ba eleisaun antesipada karik bele aloka ba prosesu eleisaun nian.

Kona-ba dívida, Rui dehan, posibilidade bainhira Governu poupa osan ho di'ak sei bele selu, maibé depende ba osan ne’e. Bainhira la sufisiente Governu hein OJE 2018 hodi selu dívida sira ne’e.

Orsamentu Duadesimu Ezekuta Tarde

Entretantu, Primeiru Ministru, Mari Alkatiri, konsidera orsamentu duadesimu ezekuta tarde ona, tanba tuir loloos ezekuta hahú mensál.

Nia dehan, tuir loloos ezekusaun orsamentu ne’e hahú Janeiru. Ne’e duni ezije ba kada ministériu tenke iha dixiplina boot iha ezekusaun osan ne’e.

“Bainhira ita falla, husik hela ita la ezekuta no fulan Janeiru remata kontabilístika fexada, ita bele dehan dudu ba fulan Fevereiru mós iha ona orsamentu nia plafond”, deklara PM Alkatiri.

Tuir Xefe Governu, loloos ezekusaun orsamentu duadesimu hahú loron 10 Janeiru 2018, maibé tarde ona. Ne’e duni, tenke esforsa aan iha loron 15 Janeiru pagamentu sira tenke selu.

Nia reforsa katak, osan la’ós elimina funsionáriu kontratadu, maibé sei ezekuta saláriu no bem servisu funsionáriu kontratadu sira. 

Read 316 times
Rate this item
(1 Vote)
AdBottom1