Segunda, 21 Maiu 2018 | Login
Foto ilustrasaun anin sobu komunidade nia uma Foto ilustrasaun anin sobu komunidade nia uma

2018, Dezastre Naturais Hamate Ema Na’in Tolu Featured

DILI: Dezde inisiu tinan 2018 mosu dezastre naturais oioin iha nasaun, hahú husi udan boot, anin boot no ahi han uma. Husi akontesimentu hirak ne’e hotu rejista kazu 1.960 no ema na’in tolu mate.

Dadus provizóriu husi Diresaun Nasionál Dezastre no Solidariedade (DNDS), Ministériu Solidariedade Sosiál (MSS), dezastre naturais ne’ebé akontese kuaze iha munisípiu hotu-hotu.

Vítima na’in tolu ne’ebé lakon vida tanba dezastre rejistradu ida husi postu administrasaun Luro, Munisípiu Lautem, no rua seluk husi postu administrativu Atsabe, Munisípiu Ermera.

Nune’e, husi kazu 1.960 ne’ebé rejistu hetan ona apoiu umanitária husi governu, liuhusi Ministériu Solidariedade Sosiál (MSS).

Xefe Departamentu Dezastre, Albino Nicolau Freitas hateten, apoiu umanitáriu ne’ebé governu fornese ba situasaun emerjénsia nian hodi bele responde ba nesesidade báziku vítima sira nian iha loron-loron.

Nia hatutan, kona-ba problema seluk ne'ebé povu enfrenta, MSS munisipál ida-idak nian sei halo verifikasaun, nune’e bele relata mai nasionál hodi bele fó apoiu.

“Kona-ba estragu saida akontese aat kaman ka totál, halo relatóriu fila-fali mai diresaun nasionál hodi bele prosesa atu bele halo rekuperasaun”, dehan Albino, iha servisu fatin, Bemori, horisehik.

Nia esplika, diresaun nasionál sei simu relatóriu husi munisípiu hotu-hotu bainhira presiza duni atu hetan asisténsia materiál konstrusaun maka diresaun nasionál sei fornese apoiu hirak ne’e.

Tuir nia, ministériu sempre prevé orsamentu ba asisténsia sosiál ba apoiu umanitária nian. Ne’e duni, bainhira simu relatóriu sei ezekuta tuir pedidu ne’ebé iha.

Antes ne’e, iha inisiu fulan Fevereiru 2018, iha Dili uma hamutuk 13 hetan estragu tanba anin no udan boot.

Husi uma hirak ne’e, uma hitu (7) ai-han hanehan iha iha Suku Bebonuk, Postu Administrativu Don Aleixo, Munisípiu Dili.

Akontese mós iha suku Bairru-Pité, ne’ebé komunidade ida nia-uma hetan estraga husi anin. Iha Suku Komoro hamutuk uma haat no uma ida iha Postu Administrativu Hera.

 Liña Eletrisidade Kotu

Antes ne’e, rai udan no ain boot ne’ebé akontese iha fulan Janeiru nia laran fó impaktu makas ba distribuisaun liña eletrisidade labele lakan normál iha munisípiu neen (6).

Anin boot ne’e halo ai boboot lubuk ida tohar monu hakotu fiu eletrisidade iha fatin balun no hanesan munisípiu Dili, Lospalos, Baukau, Aileu, Ainaru, Ermera no Bobonaru ahi lakan la normál.

Oras ne’e daudauk ekipa Eletrisidade Timor- Leste (EDTL) koloka ona tékniku sira ba hadi'a liña distribuisaun enerjia eletrisidade.

Situasaun natureza ne’e afeta ba liu-liu liña distribuisaun iha kuaze munisípiu hotu-hotu. Anin boot mai kuaze mosu iha munisípiu 12 inklui Dili halo ahi lakan la normál.

Liña distribuisaun grave liu ba iha Munisípiu Ainaru ne’ebé to’o ohin loron ahi seidauk lakan, Ermera no Aileu ahi foin lakan fila fali.

Aleinde ne’e, iha munisípiu Bobonaru iha Postu Administrativu Lolotoe besi riin eletrisidade nian balun to’o oras ne’e problema boot no ekipa tékniku ba hadi'a hela liña distribuisaun.

Iha EDTL Baukau iha suku balun hanesan, Afaloikai, no Postu Administrativu Venilale mós ahi mate no agora tékniku sira hadi'a hela.

Parte seluk iha Lospalos, iha Luro suku ida grave hela ho Iliomar tékniku sira tenta rezolve hela atu hadi'a fali ahi bele lakan.

 

Read 151 times
Rate this item
(0 votes)
AdBottom1