Print this page

Tribunál Korkorda hasees eis-Padre ba Kazu Abuzu Seksuál husi Oekusi Featured

By Cristina Ximenes Maiu 07, 2019 8855
Foto ilustrasaun labarik hetan violasaun seksual Foto ilustrasaun labarik hetan violasaun seksual

DILI: Tribunal Oekusi konkorda ho pedidu husi Ministériu Públiku hodi afasta (hasees) arguidu RD, eis-Padre ne’ebé deskonfia halo abuzu seksual ba labarik kiik sira iha Oekusi, husi ninia rezidensia anterior Enklave Oekusi.

Molok ne’e mosu akuzasaun hasoru padre ida ho inisial RD ne’ebé deskonfia kometa kazu abuzu seksual ba labarik kiik sira iha Rejiaun Administrativu Espesial Oekusse (RAEO).

Tanba akuzasaun ida ne’e, iha inisiu tinan 2019, Konsellu Vatikanu deside hodi hasai padre RD.

“Iha 24 Abril ita rona vitima balun, iha 25 Abril MP promove ba Tribunál Oekuse hodi detein arguidu ida, eis Padre ho inisial RD, tanba iha indikasaun komete krime abuzu seksual ba menor,” informa Prokuradór Jeral Repúblika (PJR) José da Costa Ximenes ba jornalista sira hafoin enkontru semanál ho Prezidente Repúblika iha Palasiu Prezidensiál Bairu-Pite, Segunda (06/05).

Nia dehan, iha 26 Abril liu husi interogatoriu dahuluk, Ministériu Públiku (MP) Públiku promove atu afasta arguidu RD husi Oekuse.

“Atu labele nafatin iha ne’eba ne’ebé bele iha perigu ba menor sira, Tribunál konkorda, tantu afasta tiha ona husi Oekuse dezde 28 Abril,” dehan PJR José.

Molok ne’e, iha fulan Fevereiru 2019, Polisia Nasionál Timor Leste (PNTL) loke prosesu investigasaun ba Amu Lulik ida ne’ebé deskonfia halo abuzu seksual ba labarik sira.

Iha altura ne’ebá, (eis) Komadante Jerál PNTL Komisáriu Júlio da Costa Hornai informa, kazu abuzu seksual husi Amu Lulik ida hasoru labarik sira iha Oekuse iha ona prosesu investigasaun.

“Kazu ne’e investiga ona, entrega ona iha polísia investigasaun kriminal. Prosesu ne’e la’o hela no prosesu ida ne’e husi polísia ko’alia ona ho parte Ministeriu Públiku ba situasaun ne’e no agora dadaun ne’e propriamente Amu Bispu mós, ami ko’alia ona no agora investigasaun ba kazu ne’e la’o hela,” deklara Komisariu Julio iha Palasiu Prezidensial, Bairru-pite, Kinta (07/02).

Julio hatutan, husi parte Dioseze husu ba polisia atu hasai estatutu Amu hodi bele tuir prosesu investigasaun, maibé PNTL laiha direitu atu hasai Amu ne’e nia estatutu tanba so Vatikanu mak bele halo ida ne’e.

“Tanba ne’e mak ami koordena ona ho parte investigadór sira no Prokuradór atu haree ba nia regras legal sira ne’e, atu nue’e haree ba ninia prosesu sira ne’e, nia (Amu) ema estrajeiru, investigador sira sei haree ninia pasaporte sira ne’e, kordena ho Prokurador sira atu nune’e prosesu tuir dalan legal,” katak nia.

Hatan kona-ba labarik hira mak sai vitima, Komisariu Julio dehan katak prosesu investigasaun ba kazu ne’e sei la’o.

“Hein de’it rezultadu investigasaun ne’e mak Komandu sei fó sai,” dehan nia.

Tuir informasaun, Amu Lulik ne’e nu’udar sidadaun Estadus Unidus Amerika ne’ebé hahú ninia serbisu iha Timor Leste iha tinan 1966. Iha tinan 1992, Amu Lulik ne’e mós estabelese uma mahon balun iha Oekusse no iha mós konventu balun ne’ebé lokaliza iha Dili.

Entretantu, Primeiru Ministru Taur Matan Ruak ne’ebé hetan konfirmasaun ba kazu ne’e hatete kazu ne’e resposablidade parte justisa nian.

“Ha’u hanoin katak prosesu ba (kazu) ne’e la’o hela no ita iha tenke fó ita-nia reispeita ba kestaun ida ne’e, tanba kestaun ida ne’e  polísia ninia no ita hotu entrega ba polísia,”  dehan PM Taur.

Rate this item
(1 Vote)

Related items