Tan Sasoro, Laen Buti Fen-nia Kakorok

By Marsu 23, 2017 3198
Ilustrasaun: laen bukti feen nia kakorok Ilustrasaun: laen bukti feen nia kakorok

DILI: Bainhira Apa No (la’os naran loos) loke sanan matan tensaun sa’e kedan, tan la’os sasoro ba labarik mak Ama Noy (la’os naran loos) maibé bee-manas.

Ho nervozu Apa No fakar tiha bee-manas ne’e no lori nia oan ba toba. Bainhira Ama Noy fila mai haree, Ama Noy hakfodak no foti tudik hodi baku ba Apa No nia ain.

Ho asaun ne’e, Apa No hadeer no hahú hala’o reasaun hasoru Ama Noy. Apa No tuku Ama Noy nia rentos dala ida, basa hasan dala rua iha parte karuk no loos, tuku Ama Noy monu ba rai, sama nia hirus matan no buti nia kakorok halo Ama Noy dada is la sai, no tuku dala-barak iha isin lolon.

Liu husi audensia julgamentu iha Tribunal Distrital Dili (TDD), Tribunál lee sai akuzasaun husi Ministériu Públiku (MP) katak, iha 24 Janeiru 2016 iha Maubara, Munisipiu Likisa, Ama Noy ba ku’u modo, la dook husi sira-nia hela fatin, nune’e Apa No ba bolu atu mai fó susu labarik.

“Lezada dehan hein lai, ha’u ba haris lai mak fó susu, nune’e lezada mai uma arguidu ho labarik toba hela, no lezada haree bee-manas iha ahi-matan arguidu fakar tiha,” deklara MP iha TDD, Kuarta (22/03).

Haree ba ida ne’e, lezada tama ba uma hodi fanu arguidu no husu tanba sa mak arguidu fakar bee-manas. Lezada foti tudik tau ba arguidu nia ain fukun boot, nune’e arguidu hader hodi tuku lezada.

Hatan ba akuzasaun ne’e, arguidu deklara katak, faktus ne’e loos. Iha momentu ne’e nia tuku duni lezada tanba la tein sasoru fó ba labarik.

“Ha’u baku ne’e iha altura ne’eba lezada haruka ha’u kous labarik ba halimar, depois sasoro tasak tiha mai hodi fó haan ba labarik, maibé to’o mai bee mak tidin hela iha ahi-matan, maibé sasoro laiha, tanba ne’e ha’u nervozu, fakar tiha bee, ha’u ho labarik ba toba tiha,” dehan arguidu.

Iha fatin hanesan, lezada dehan, arguidu baku nia tanba la fó sasoro ba labarik.

Nia dehan, hafoin problema ne’e nia ho nia kaben moris hamutuk hanesan baibain no laiha tan problema to’o agora.

Rona deklasaun ne’e, Tribunál husu ba MP atu halo alegasaun. Liu husi alezadu MP husu ba Tribunál atu fó pena prizaun tinan ida (1) suspende ba tinan 1 fulan neen (6).

Entretantu, defeza husu ba Tribunál atu fó pena ne’ebé mak adekuadu tanba arguidu arepende ba nia sala no iha futuru sei la halo tan.

Tribunál deside adia julgamentu ne’e ba 31 Marsu 2017 hodi rona desizaun final.

Audensia julgamentu ne’e prezide husi Juiz Singular Maria Modesta, Ministériu Públiku reprezenta husi Prokuradór Osório de Deus, no arguidu hetan asistensia legal husi Defensór Públiku Rui Guterres.

Tama Prizaun Tinan 2

Entretantu, iha julgamentu ba kazu violensia domestika ne’ebé komete husi arguidu RR hasoru nia feen LR, Tribunal aplika pena prizaun tinan 2 no pena suspensaun ba arguidu kada fulan mai aprezenta an iha TDD, nune’e mós Tribunál kondena arguidu selu taxa $40 ba Tribunál.

Aleinde ne’e, Tribunál mós fó tempu loron 15 ba arguidu ho lezada atu mai husu Tribunál hodi husu deskulpa ba públiku.

Liu husi prosesu julgamentu, Kuarta (22/03), MP akuza katak, iha 29 Novembru 2016 iha Tasi-Tolu, bainhira arguidu fila serbisu kalan, lezada dehan ba arguidu katak agora ne’e ema hana-malu barak, maibé arguidu la simu lezada nia lia fuan, nune’e arguidu dada sai lezada ba li’ur no xave odamatan.

Lezada mós la simu arguidu nia hahalok nune’e lezada foti fatuk tuda arguidu nia kotuk-laran, tan ne’e arguidu baku lezada no tuda tan lezada nia ulun to’o monu rai.

Ho arguidu nia hahalok, lezada tenke ba halo tratamentu iha Ospitál.

Arguidu deklara ba Tribunál katak nia la tuda direitamente lezada maibé tuda kalen mak kona lezada.

Lezada informa ba Tribunál katak, arguidu tuda direitamente ba nia ulun.

Audensia julgamentu ne’e prezide husi Juiz Singular Eugebio Xavier, MP reprezenta husi Prokuradór Osório de Deus, no arguidu hetan asistensia legal husi Defensór Públiku José da Silva.

 

Rate this item
(0 votes)

Independente Digital TV