Polisia Nasionál Servisu Investigasaun Kriminal (PNSIK) kaptura membru artemarsiais hirak ne’e bainhira tuun husi aviaun Nam Air no Silk Air hafoin hala’o viajen husi Indonezia mai Timor Leste.
“Atividade artemarsiais ne’ebé ita hotu akompaña katak ita-nia oan sira, ita-nia joven sira ba hasai sabuk iha rai li’ur, Indonézia. Foin dadauk ita akompaiña ita kaptura na’in 36 iha Aeroportu Internasionál Nicolau Lobato. PNSIK halo tiha ona rejistu ba MP, depois ita hein delegasaun kompetensia, MP rasik maka kaer (prosesu ne’e)... ita kontinuasaun prosesu investigasaun,” dehan Komandante Jeral PNTL, Komisriu Julio da Costa Hornai ba jornalista sira hafoin enkontru semanál ho Prezidente Repúblika Francisco Guterres Lu Olo iha palasiu Prezidensiál Bairu-Pite, Dili, Kinta (20/09).
Komisariu Julio dehan, polisia kontinua fó hanoin ba públiku, liliu ba sira ne’ebé envolve an iha organizasaun artemarsiais katak to’o ohin lei númeru 5/2017 ne’ebé bandu atu hala’o atividade artemarsiais sei vigora nafatin.
“Ha’u husu ba ita-nia oan sira, joven sira atu bele intende, kompriende no halo tuir saida mak ita-nia lei sira hatete, atu ita-nia rai ne’e bele asegura nafatin,” dehan nia.
Molok ne’e, PNSIK deklara hafoin halo kapturasaun, polisia aplika Termu Identidade Rejidensia ba membru artemarsiais sira ne’ebé hetan kaer.
“Depois halo tiha identifika ba membrus 36 ne’e, PNSIK aplika kedas TIR no mós konstrui sira nu’udar arguidu,” informa Sub Xefe Servisu Investigasaun Kriminal Nasionál, Inspetor Xefe Mouzinho T. Correia ba jornalista sira iha Kuartel Jeral PNTL, Kaikoli, Tersa (18/09).
Medida ne’ebé PNSIK foti, nia dehan, tanba iha evidensia farda, sabuk, kartaun identidade no imblema artemarsiais ne’ebé sira lori iha pasta laran.
Nia dehan, kapturasaun ne’e halo bazeia ba orden husi Ministériu Públiku relasiona ho atividade ilegal tuir lei númeru 5/2017. Operasaun ne’e nu’udar operasaun konjunta ida entre PNSIK, alfandega, CSNI, no SIP.
“Ami lori sira ba Kuartel Jeral PNTL hodi halo prosesu identifikasaun hahú iha kalan maizumenus tuku 20:00 to’o tuku 02:00 (madrugada),” dehan nia.
Nia informa liu tan, membru artemarsiais ne’ebé hetan TIR sei hein prosesu tuir mai tanba evidedensia ne’ebé iha aprezenta ona ba Ministeriu Publiku.
“Sira-nia viajen ba Indonezia legal tanba iha vistu. Maibé atividade ne’ebé sira halo mak illegal,” nia esplika.