“Prokuradór Jerál Repúblika toma ona inisiativa para kria ekipa ida atu investiga prosesu ida ne’e”, dehan Prokuradór Jerál Repúblika (PJR), José da Costa Ximenes, iha Palásiu Prezidensiál Ai-Tarak Laran, horisehik.

Kazu ne’e entrega rasik entrega ona ba Gabinete Sentrál Kombate Korrupsaun no Kriminalidade Organizadu no prokuradoria Baukau hodi toma kontra ba prosesu ne’e.

Oras ne’e daudaun, Ministériu Públiku halo ona aprensaun ne’ebé partisipasaun husi Serbisu Kriminál Nasionál PNTL nian.

Bazeia ba partisipasaun ne’e rasik, Ministériu Públiku mós inisia no promove buska iha prensaun ne’e.

Buska aprensaun, José dehan, halo tiha ona ba ró hamutuk 15. Ró hirak ne’e agora daudaun atraka iha Portu Dili hodi hein prosesu investigasaun.

Antes ne’e, Governu Timor-Leste suspende ona lisensa ba ró xinés ne'ebé deskobre halo peska ba tubaraun iha tasi timoroan nian. Investigasaun hatudu katak empreza la kumpre kritériu legál.

Ministru Agrikultura ho Peska, Estanislau Aleixo da Silva hatete, informasaun husi Governu Indonézia, ró xinés sira ne’e komete hela irregularidade. Ne’ebé Governu Timor-Leste prende ona ró sira ne’e iha Karavela.

Maski nune’e, Ministru Estanislau dehan, prontu atu ba responsabiliza iha Parlamentu Nasionál (PN).

“Ha’u mós la ta'uk atu ba aprezenta iha PN hodi esklarese buat ne’ebé parlamentu hakarak (atu ba aprezenta)”, dehan Ministru Estanislau.

Seidauk iha serteza kompañia ne’e kaer tubaraun, maibé tuir Ministru Estanislau, tubaraun barak sira kaer ne’e la'ós protejida, tanba Amérika, Austrália no Indonézia mós kaer tubaraun.