Kuarta, 12 Dezembru 2018 | Login
Komisáriu Júlio da Costa Hornai Komisáriu Júlio da Costa Hornai

Komandu FFDTL-PNTL Investiga Kazu Maliana Featured

DILI: Komandu husi Instituisaun FALINTIL Forsa Defeza Timor-Leste (F-FDTL) no Polisia Nasionál Timor-Leste (PNTL) haruka ona ekipa konjuntu investigasaun permanente prosesu kazu ‘se kilat ba malu’ iha Munisípiu Maliana, Sábadu (4/8).

Komandante Jerál PNTL, Komisáriu Júlio da Costa Hornai hateten, ekipa konjuntu Investigasaun permanente hahú servisu ona, horisehik, Segunda (3/8), hodi rekolla dadus sira para atu loke prosesu investigasaun.

“Ita hatene katak lei husi instituisaun rua ne’e nian hakerek klaru ona kona-ba utilizasaun arma sira ba nesesidade servisu nian, la’ós uza hodi ameasa malu ka povu”, dehan nia, iha servisu fatin, Kaikoli, horisehik.

Tanba ne’e, instituisaun rua ne’e mantein pozisaun hodi foti medida ida ne'ebé rigorozu ba membru instituisaun rua ne’e baihira identifika komete duni erru ne'ebé hafo'er naran instituisaun nia-naran.

“Ami husi komandu rua hein rezultadu investigasaun ne'ebé ekipa permanente hala’o daudaun iha Maliana”, tenik nia.

Husi prosesu investigasaun ne'ebé hala’o husi ekipa konjuntu ne’e, rezultadu ikus sei relata ba komandu husi instituisaun ida-idak nian hodi estuda. Tan ne’e, komandu rua seidauk bele ko’alia buat ida kona-ba motivu akontesimentu inklui membru na’in hira mak envolve iha kazu ne’e.

Entretantu, kazu ne’e rasik akontese iha Sábadu (4/8), iha Maliana, depois komandu rua simu informasaun haruka kedas ekipa konjuntu ba Maliana hodi halibur dadus atu relata fila fali mai komandu.

Portantu servisu konjuntu ne’e rasik sei aprezenta ona ba Ministru Defeza Interiór interinu para bele update nafatin informasaun kona-ba prosesu ne'ebé la'o daudaun iha Maliana.

Entretantu, atitude premanizmu ne’ebé hatudu husi membru instituisaun F-FDTL no PNTL hamosu preokupasaun husi públiku tanba bele halo pániku populasaun sira.

Organizasaun Sosiedade Sivíl Asia Justice And Right (AJAR), preokupa ho atitude militár ho polisia ne'ebé lori patrimóniu Estadu nian hodi halo ameasa ba malu.

Soldadu sira halo hela servisu seguransa iha terrenu ba fali hemu tua iha fatin públiku hatudu komunikasaun la di'ak ba malu uza kilat ho pistola hodi solusiona sira nia tensaun iha fatin públiku.

Peskizadór AJAR, Inocêncio de Jesus Xavier hateten, politikamente Timor-Leste sei moris iha situasaun inserteza laran. Tanba ne’e, bainhira membru instituisaun rua ne’e maka hatudu atitude premanizmu bele hamosu fali instabilidade seguransa.

Instituisaun rua ne’e halo servisu la'ós hatudu sira nia profisionalizmu iha fronteira nian, maibé sira ba hemu fali tua iha públiku hodi uza kilat hodi halo ameasa ba ema nia vida.

Nia dehan, situasaun ne’e labele tolera, tanba bele hatoman-aan ho atitude hanesan ne’e hodi uza patrimóniu Estadu ameasa ba malu.

Ne’e duni, husu ba Ministériu Interiór no Defeza atu foti desizaun rigorozu ba komandu rua ne’e ho situasaun ne’e atu membru sira labele halimar ho arma.

Read 1199 times
Rate this item
(0 votes)