Kuarta, 12 Dezembru 2018 | Login
Ilustrasaun mate-isin. FOTO: Thinkstock Ilustrasaun mate-isin. FOTO: Thinkstock

Kazu Sona Mate Carlos iha Hera Ohin, Polisia Kaer tan Na’in 5 Featured

DILI: Kazu sona mate Carlos da Costa iha Hera, Munisipiu Dili, iha fulan kotuk sai naruk liu tan no envolve suspeitu barak liu tan. Iha inisiu fulan ne’e polisia kaer ona suspeitu na’in haat, no ohin, Kuarta (10/10), polisia sei kaer tan suspeitu na’in lima (5) seluk.

Ofisial polisia ida ne’ebé lakohi públika ninia identidade informa, iha Tersa (09/10) Polisia Servisu Investigasaun Kriminal Munisipiu Dili simu tan mandadu detensaun husi Tribunal Munisipiu Dili (TMD) hodi halo tan kapturasaun ba joven na’in lima.

Nia dehan, TMD rasik mak indika atu polisia halo kapturasaun ba ema na’in lima seluk relasiona ho kazu omesidu agravadu hasoru Carlos da Costa ne’ebé akontese iha Hera iha 9 Setembru 2018.

“Orden (detensaun) ne’e sei ezekuta iha loron 10 Outubru dader maizumenus tuku 09:00,” informa fonte ne’e horseik.

Ho kapturasaun ba na’in lima ne’e signifika sei iha suspeitu na’in sia mak tuir prosesu justisa ba kazu oho Carlos iha Hera.

Entretantu iha 3 Outubru foin lalais, polisia konsege kaptura suspeitu na’in haat ho inisial FFR, LBG, AG no AC, hafoin simu karta detensaun husi tribunal iha 2 Outubru.

Komandante Polisia Munisipiu Dili, Superintendente Xefe Pedro Belo kapturasaun ba suspeitu na’in haat ne’e ho kooperasaun husi autoridade local, inklui Ofisial Polisia Suku no Konsellu Polisiamentu Komunitariu.

“Tribunal fó karta detensaun iha loron 2 Outubru 2018 husu polisia atu ezekuta orden ida ne’e. Ne’eduni iha 3 Outubru 2018, SIK aranka ba Hera iha oras dader tuku 08:30 hodi lori joven na’in haat ne’e ho karta notifikasaun ne’ebé tribunal fó sai,” informa Pedro Belo iha nia knar fatin.

Nia hatutan, polisia kaptura uluk suspeitu na’in rua, FFR no AC, iha Ailok-Laran, Hera, hafoin kaptura tan LBG no AG iha aldeia Mota Ki’ik, Hera.

Suspeitu ida ho inisial AG, Komandante ne’e informa, bainhira polisia to’o nia uma, suspeitu ne’e iha hela eskola, nune’e polisia husu ba ninia inan-aman atu ba bolu, hafoin polisia kaptura suspeitu refere.

Komandante ne’e dehan tan, SIK halo identifikasaun ba suspeitu sira no tuir mandadu tribunal sira tenke kumpri oras 72 hodi hein prosesu julgamentu.

Read 667 times
Rate this item
(0 votes)