Hetan Ameasa Prizaun to’o Tinan 8 ba Ema Na'ok Motor no Falsifika Dokumentu Featured

By Maiu 26, 2017 1800
Ema na'ok motor Ema na'ok motor

DILI: Tuir Kodigu Penal Timor-Leste artigu 272 no 304 hatete, ema ne’ebé komete krime Reseptasaun Gravada hetan pena prizaun tinan 2 to’o tinan 8 no pena prizaun tinan 2 to’o tinan 6 ba krime Falsifikasaun Gravada.

Iha Kinta (25/05), Tribunal Distrital Dili hala’o audensia julgamentu ba arguidu na’in rua ho inisial HM no OS ne’ebé tuir akuzasaun Ministériu Públiku komete krime Reseptasaun Gravada no Falsifikasaun Gravada.

Tuir akuzasaun MP, iha 2012 Polisia Munisipiu Vikeke ne’ebé hala’o patrulla hapara arguidu na’in rua ne’ebé halai ho motór marka Honda Win ho velusidade maka’as.

Hafoin, polisia hala’o pasarevista ba arguidu ne’ebé kaer motor no identifika katak arguidu laiha karta kondusaun.

Hatan ba akuzasaun ne’e, arguidu HM hatete, motor ne’e nia sosa la’os naok. Iha momentu polisia prende, nia ba vizita nia familia.

“Motór ne’e ha’u uza durante tinan ida ona mak polisia foin prende. Motor ne’e ha’u sosa iha Komoro, momentu ne’ebá sira nonton hela bola iha tuku 3 (madrugada). Ha’u sosa ho $750 dollar,” dehan nia.

Arguidu rekoñese katak nia sosa motor ne’e laiha dokumentu no laiha xapa matrikula.

Iha fatin hanesan, arguidu OS dehan, nia la koñese HM maibé momentu ne’e tanba HM atu ba Ossu nune’e OS husu ajuda atu bele tuir HM.

“Ha’u la hatene motor na’ok ka dokumentus laiha, derepente de’it polisia prende no kaptura, (depois dehan) motor ne’e laiha dokumentus no plat (xapa) la loos,” dehan OS.

Entretantu, Olimpia da Costa nudar na’in ba motor hatete, motor ne’ebé HM uza ne’e nia subriñu sosa ho folin $1.000. Bainhira nia subriñu atu ba serbisu iha Australia, nia husik hela motor ne’e ba nia tiun (Olimpia nia kaben) hodi uza.

Nia dehan, motor ne’e foin uza durante fulan 8. Iha altura motor ne’e lakon, nia dehan, nia kaben para hela motor iha varanda, maibé dader bainhira atu ba serbisu motor ne’e laiha ona.

“Iha momentu ne’e kedas ami buka motor, ami informa ba polisia sira hodi buka tuir maibé ikus mai polisia sira hetan fali motor ne’e iha Ossu,” hatete lezada.

Iha alegasaun MP husu Tribunál aplika pena prizaun ba arguidu HM no ba arguidu OS, MP husu absolve tanba laiha faktus ne’ebé prova envolvimentu husi OS.

Entretantu, Defeza husu ba Tribunál atu fó pena ne’ebé adekuadu tanba arguidu HM sosa motor ne’e no la hatene katak motor ne’e motor na’ik nian.

Rona husi parte rua ne’e, Tribunal adia julgamentu ba 1 Juñu 2017 hodi rona desizzaun Final.

Audensia julgamentu ne’e prezide husi Juiz kolektivu, Ministériu Públiku  reprezenta husi Prokuradór Osório de Deus, no arguidu hetan asitensia legal husi Defensór Públiku Estaqi Guterres.

 

Rate this item
(0 votes)

Independente Digital TV