Gastão Sousa Hetan Pena Suspensaun Tinan Rua-Resin Featured

By INDEPENDENTE Outubru 12, 2018 7061
Gastão Sousa, eis-Ministru Obras Publika (MOP) Gastão Sousa, eis-Ministru Obras Publika (MOP)

DILI: Tribunál Munisipál Dili (TMD) liu husi leitura akordaun kondena arguidu Gastão Sousa, eis-Ministru Obras Publika (MOP) no Diogo da Costa, Eis-Xefe Gabinete ho pena suspensaun.

Nune’e arguidu sira seluk hanesan arguidu Martinho Gusmão, Ferlio Sousa ho Jordão Sousa ne'ebé hanesan arguidu Gastão nia oan, hetan absolve.

Tribunál kondena arguidu na’in rua Gastão ho pena prizaun tinan rua fulan neen no suspende ba tinan rua fulan neen no arguidu Diogo tinan ida fulan neen no suspende ba prizaun tinan ida fulan neen.

Nune’e, Tribunál mós aplika indenizasaun ba arguidu Gastão ho kustu $100.00 no arguidu Diogo $50.000.

Tribunál kondena arguidu na'in rua tanba konsidera katak, sira hatene karreta ne’e pertense ba Estadu nian maibé autoriza ba ema seluk uza ba nesesidade privadu. Nune’e konsidera prienxe ba rekizitu krime pekulatu no pekulatu-de-uzu tuir Kodigu Penál Timor Leste.

Tribunál mós absolve arguidu Gastão husi Krime Administrsaun Danoza no absolve arguidu Diogo husi krime Falsifikasaun Dokumentu, tanba la komprova.

Entretantu, defeza husi arguidu Gastão nian la simu desizaun primeira distansia, tanba ne’e sei halo rekursu.

“Aban ami hein de'it Tribunál notifika, ami sei halo ona rekursu ba Tribunál Rekursu”, dehan Defensór Públiku, Fernando, iha TMD, horisehik.

Iha parte seluk, Estaquio Guterres, defeza husi arguidu Martinho, Ferlio no Jordão, apresia ho desizaun tribunál ne'ebé absolve nia kliente na'in tolu ne’e.

“Antes ne’e kedas hau husu absolve ba ha'u nia kliente sira ne’e, tanba sira la sala duni”, tenik nia.

Leitura akordaun ne’e prezide husi juis koletivu, Albertina Neves, António do Carmo ho Zumiaty Freitas, Ministériu Públiku reprezenta husi prokuradór Jacinto Babo, arguidu hetan asisténsia legál husi Defensór Públiku.  

Rate this item
(0 votes)

Independente Digital TV