Domingu, 17 Novembru 2019 | Login
asidente iha tinan 2019 asidente iha tinan 2019

Fulan 4 Asidente Trafégu 309, Na'in 9 Mate Featured

DILI : Tuir dadus husi Departamentu Tranzitu Nasional PNTL, durante fulan haat (4) nia laran, hahú husi fulan Janeiru to'o Abril, mosu kazu asidente trafégu hamutuk 309. Husi kazu ne'e ema na'in sia (9) mak mate.

Diretór Departementu Tranzitu Nasionál Inspetór Xefe Polísia, António Soares hatete, iha  fulan Janeiru to'o Abril, Dpartementu Tranzitu Nasionál rejistu asidente rodaviária hamutuk 309 kazu. Entre kazu ne’e ema na'in 9 mak mate.

Tuir António, kauza husi asidente ne'ebé PNTL rejistu mai husi fator umanu, tanba dala-barak ema sempre laiha konsénsia atu komprimenta regulamentu kodigu estrada, halai motor arbiru, lakoi uza kapasete inklui la respeita sumafru (trafiku lite) ne’ebé koloka ona iha dalan públiku sira.

Nia dehan, joven sira bainhira konsumu alkhool, envez deskansa, maibé kondus fali motorizada hodi rezulta asidente.

“Ida ne'e mak implika ba iha asidente rodaviáriu, depois rezulta sira mate, kanek todan, nee tanba laiha konsénsia," dehan António Soares ba jornalista sira iha UNITAL-Bekora, Kinta (02/05).

Komandante Tranzitu Nasionál ne'e, husu ba públiku bainhira sirkula iha estrada públiku, utiliza kareta ka motor tenke respeita sinais tranzitu sira ne’ebé kolokadu ona.

“Ha'u nia mensajen ba iha públiku enjerál, katak diak liu ita prevene ita nia an, dúke ita tama ba risku asidente trafiku neebé mak rezulta ita mate no kanek, tanba nee mak hau apelu ba maluk sira hotu, bainhira sirkula iha estrada públiku, tenki kumpre no respeita sinais tranzitu neebé koloka ona iha estrada públiku, liuliu ba iha sumafru (trafiku lite)," katak nia.

Entertantu, Diresaun Nasionál Seguransa Rodaviária (DNSR), tuteladu iha Ministériu Interiór (MI), kontinua halao desiminasaun no sensibilizasaun seguransa rodaviária ba estudante Universidade Orientál Timór-Lorosae (UNITAL). hodi halo prevensaun seguransa rodaviária atu salva ema nia vida, nunee dezenvolve nasaun Timór-Leste.

Reprezentante Komandante Jerál (PNTL), Diretór Departementu Tranzitu Nasionál, Inspetór Xefe Polísia, António Soares, hatete desiminasaun seguransa rodaviária ba estudante (UNITAL), importante tebes atu habelar informasaun ba universitáriu sira, atu bele prevene sira an, bainhira utiliza kareta no motor, sirkula iha estrada públiku tenki komprimenta lei no regulamentu kodigu estrada.

Iha fatin hanesan, Reitór UNITAL, Florindo Pereira, hatete prezensa Diresaun Seguransa Rodaviária, husi Ministériu Interiór iha Universidade Orientál Timór-Lorosae (UNITAL), atu sosializa kodigu estrada rodaviáriu nian ba estudante sira tuir regulamentu ne’ebé mak hatudu ona iha kodigu estrada.

Nia dehan, lei kodigu estrada ne’e di’ak, maibé konsénsia umanu nian atu uza dalan públiku sira tuir ninia regra.

Read 1862 times
Rate this item
(0 votes)