Tersa, 18 Dezembru 2018 | Login
Borlaco Borlaco

Eis-Membru Governu Tama Prizaun Featured

DILI: Eis-Sekretáriu Estadu Fortalesimentu Institusionál (SEFI), Francisco Borlaco, eis-Membru V Governu Konstitusionál, iha Sesta (15/9), hetan kondenasaun husi Tribunál Distritál Dili (TDD) tama prizaun tinan hitu, iha momentu ne’ebé hanesan membru governu foun sira simu pose.

Iha prosesu julgamentu Tribunál deside katak Francisco envolve iha kazu partisipasaun ekonomia no negósiu tuir artigu 299 husi Kódigu Penál ho pena prizaun tinan hitu (7) no selu indiminizasaun $106.000 ba Estadu.

Antes atu halo leitura akordaun Tribunál aprezenta faktu foun ba Ministériu Públiku ho Defensór Públiku bazeia ba deklarasaun testemuña nian, maibé Ministériu Públiku mantein nafatin hodi defende alegasaun finál.

Iha leitura akordaun ne’e Tribunál Tribunál haree katak faktu ne’ebé husi Ministériu Públiku aprovadu hotu kedas. Tanba ne’e, Tribunál aplika pena Prizaun tinan 7 efetivu ba arguidu Francisco da Costa Borlaco.

Alende ida ne’e mós Tribunál husu ba defeza atu halo rekursu ba Tribunál Rekursu (TR) durante loron 15 hahú husi segunda (18/09).

Tuir akuzasaun Ministériu públiku, iha fulan Janeiru to’o Dezembru tinan 2007-2008 Ministériu Saúde loke tenderizasaun ba konstrusaun Hospital Referral Baucau.

Orsamentu ba projetu ne’e montante tokon 4 ne’ebé manan husi kompañia internasionál More Green husi Koreia Súl ho nia naran Un Taek Yi.

Obra ne’e nia fiskál atinje 4% kompañia hahú abandona, maibé altura ne'ebá iha tinan 2008 arguidu hanesan diretór nasionál aprovizionamentu ministériu finansas, maibé arguidu halo pedidu pagamentu bazeia ba orientasaun husi asesór legál husi Ministériu Finansas.

Pagamentu halo ba konta bankária privadu ne’ebé ho naran Leonito Freitas Belo ho Américo Dias, la'ós ba konta bankária kompañia nian More Green. Totál osan ne’ebé arguidu mensiona iha pedidu pagamentu haruka ba iha Ministériu Finansas hamutuk $107.028,34.

Tuir planu, durante loron 15 nia laran, parte defeza sei halo rekursu ba desizaun tribunál nian tanba la konkorda ho desizaun ne’ebé foti ona.

Iha audiénsia julgamentu ne’e prezide husi juis koletivu Eugebio Xavier, Jacinta Correia, Ana Paula, Ministériu Públiku reprezenta husi prokuradora Lídia Soares, arguidu hetan asisténsia legál husi Defensór Públiku, Câncio Xavier.  

Read 2646 times
Rate this item
(1 Vote)