Segunda, 21 Outubru 2019 | Login
Ilustrasaun nehan falsu. FOTO: Pantau.com Ilustrasaun nehan falsu. FOTO: Pantau.com

Baku Tohar Nehan ho Besi Kanu, Vitima husu Autór Sosa Nehan Falsu Featured

DILI: Vitima ida ne’ebé nia nehan tohar tanba hetan baku ho besi kanu husi suspeitu ho inisial JL husu atu suspeitu sosa nehan falsu hodi troka nia nehan ne’ebé tohar.

Vitima ho inisial GSC hato’o kestaun ne’e durante prosesu julgamentu iha Tribunal Munisipiu Dili (TMD), Segunda (04/02).

Molok hala’o julgamentu, tribunal husu ba lezadu atu dada fali kazu ne’e tanba konsidera kazu refere ho natureza semi públiku, tan ne’e lei fó dalan atu lezadu dada fali krime hasoru arguidu.

Ba pedidu husi tribunal ne’e, lezadu dehan, nia hakarak dada kazu ne’e maibé tenke ho kondisaun, katak arguidu tenke sosa nehan falsu hodi troka lezadu nia nehan ne’ebé tohar.

Arguidu konkorda atu sosa nehan falsu troka lezadu nia nehan.

Arguidu dehan iha altura ne’ebá nia ho kondisaun lanu nune’e nia halo asaun refere la ho intensaun atu hakanek arguidu, tanba lezadu ho arguidu nu’udar kolega ne’ebé serbisu hodi fó seguransa ba ministériu edukasuan.

Tribunal fó prazu loron 18 ba arguidu atu kumpri nia promesa hodi sosa nehan falsu.

Entretantu, tuir akuzasaun husi Ministériu Públiku (MP) iha 5 Abril 2017 tuku 23.30 kalan bainhira lezadu hala’o hela serbisu hanesan seguransa iha ME, teki-teki arguidu mosu mai ho kondisaun lanu, la hatais kamiza no lori besi kanu.

Iha altura ne’ebá arguidu dehan “O mak ha’u buka” ne’ebé refere ba lezadu.

Hafoin hasai lia-fuan ne’e, arguidu lori besi kanu hodi baku lezadu nia ibun ne’ebé rezulta lezadu nia nehan ida tohar, hafoin arguidu baku tan lezadu nia kanuruk ne’ebé halo lezadu nia oin nakukun.

MP akuza arguidu ba krime violensia domestika forma ofensas integridade fiziku simples ne’ebé previstu iha artigu 145 kodigu penal.

Read 1980 times
Rate this item
(0 votes)