Aman Ida Halo Violasaun Seksual ba Oan-feto Featured

By Tomé Amado Janeiru 18, 2019 15002
Ilustrasaun foto: Aman halo relasaun sexual ho oan rasik Ilustrasaun foto: Aman halo relasaun sexual ho oan rasik

DILI: Aman ida ho inisial JS hatudu hahalok imoral ameasa no obriga nia oan-feto hodi halo relasaun seksual.

Vitima nia inan no JS nia feen, ho inisial MG, konta asaun imoral ne’ebé nia laen komete hasoru nia oan-feto rasik katak, iha kalan ida iha tinan 2015, JS tama ba sira-nia oan-feto nia kuartu ho tudik hodi ameasa nia oan-feto atu halo relasaun seksual.

“Iha kalan boot bainhira ami toba ona, nia (JS) lori tudik tama ba ha’u-nia oan-feto nia kuartu. Nia tama ho kondisaun lanu. Nia fanu ha’u-nia oan no dehan atu halo relasaun. Bainhira ha’u-nia oan atu hakilar, nia se tudik ba ha’u-nia oan nia kakorok hodi dehan “o lakohi ha’u oho o”,” MG konta ho mata-been.

MG hatutan, iha loron tuir mai, nia oan-feto hasoru nia no konta sai nia aman ninia hahalok ne’ebé halo MG nia fuan semo sai husi isin.

“Bainhira ha’u rona ha’u-nia oan-feto konta hahalok husi nia aman, ha’u hatete di’ak liu ha’u mate de’it ona duke ha’u moris atu haree buat aat sira ne’e,” katak nia.

Ho forsa uitoan ne’ebé iha, MG deside hodi hato’o keiza ba polisia no liu tiha semana ida, hafoin simu karta detensaun husi TMD, polisia halo kapturasaun ba arguidu no detein iha sela durante oras 72 hafoin prosesa.

Hafoin hein durante tinan tolu nia laran, ikus mai iha Tersa (15/01), TMD foti duni desizaun hodi aplika pena prizaun tinan 7 ba JS.

Entretantu, hafoin desizaun husi tribunal sai, Komando PNTL Munisipiu Dili halo kedan kapturasaun ba JS.

Komandante Daruak PNTL Munisipiu Dili, Superintendenti Asistente Euclides Belo hatete, polisia halo kapturasaun ba suspeitu bazeia ba mandadu detensaun ne’ebé TMD fó sai ho númeru NUC: O521/15DCMR.

“Ami nudar ajenti seguransa estadu nian prontu nafatin ezekuta orden. Ami-nia membru kaptura suspeitu iha area Formosa, Xina Maromak nia oin,” informa nia.

Polisia lori JS ba Komando Kaikoli hodi halo identifikasaun no liu oras haat polisia lori JS ba prizaun Bekora hodi kumpre desizaun tribunal nian.

Rate this item
(0 votes)

Independente Digital TV