Segunda, 21 Maiu 2018 | Login
Ilustrasaun Toto Bola Ilustrasaun Toto Bola

MT La'ós Asina Akordu Kasino mas Jogu Toto Bola no Lotaria Featured

DILI: Ministru Turizmu, Manuel Lito Vong ho Vise-Ministru, Rui Menezes, rejeita asina akordu ba kontratu jogu kasino. maibé Governante na'in rua ne’e asina kontratu tanba Hamatomo husi Japaun no Doubel Six Indonézia atu loke investimentu jogu lotaria no toto bola.

Ministru Vong hateten, labele husik investidór sira ne’e iha rai li'ur, maibé ministériu ne’e iha intensaun hodi enkaixa hotu investidór sira. Tanba ne’e, ministru ho vise-ministru halo kontratu ba investidór husi Japaun ho Indonézia.

“Fó oportunidade hanesan ba ema sé de’it hakarak halo atividade ekonomia liuliu negósiu”, dehan nia, iha knaar fatin, Faról-Dili, horisehik.

Ministru ne’e mós lakohi komenta kona-ba kompeténsia Xefe Governu nian hodi hapara kontratu ba investidór rua atu loke jogu.

Nia hatutan, akordu loloos ne’e la’ós jogu kasino, maibé jogu toto bola no lotaria ho garante investimentu tokon $5 ba Estadu.

Desizaun ne’ebé ministru ho vise-ministru halo hodi asina akordu tanba lei fó dalan. Ne’e duni, na'in rua ne’e halo akordu tuir kbiit lei haruka.

Bainhira rekizitu balun ne’ebé investidór rua ne’e la prienxe didi'ak, kompeténsia Servisu Rejistu no Verifikasaun Emprezariál (SERVE) nian hodi regula lisensa komérsiu.

Nune’e, vise-ministru Turizmu, Rui Menezes hatete, bainhira suspende investidór sira nia atividade halo investimentu la'ós investidór sira mak lakon, maibé timoroan mak lakon iha dezenvolvimentu investimentu.

Nia dehan, Timor-Leste mak hakarak trava investidór sira atu investe, nune’e sira bele muda fali nasaun seluk.

Tuir nia, Timor-Leste nia burokrasia halo impedementu ba investidór sira. Ne’e duni, susar tebes atu halo kompetetivu ba dezenvolvimentu ekonomia.

Ministru Turizmu, Manuel Lito Vong, Vise-Ministru, Rui Menezes, Kinta 25 Janeiru 2018, asina ona akordu investimentu jogu lotaria no jogu toto bola ho kompañia Hamatomo husi Japaun no Doubel Six husi Indonézia.

Antes ne’e, Primeiru Ministru, Mari Alkatiri, deklara hodi hapara akordu ne’ebé Ministru Turizmu, Manuel Vong, ho vise-ministru, Rui Menezes, asina hodi loke jogu iha Dili laran. Akordu ne’e suspende tanba lei seidauk autoriza.

Primeiru Ministru, Mari Alkatiri hateten, hakarak ka lakohi tenke hapara akordu ne’ebé ministru turizmu ona. Bainhira sasán sira ne’ebé atu akontese iha nasaun ne’e tenke tuir lei, la’ós tama arbiru de'it to’o ikus kria konfuzaun iha rai laran.

“Ha'u haruka suspende ona, ha'u mak manda iha ne’e. Tanba Governu ne’e iha xefe ida de'it, la'ós xefe rua-tolu”, tenik Alkatiri, iha Palásiu Governu, horisehik.

Nia hatete, nu'udar Primeiru Ministru hatún ona orientasaun suspende ona orientasaun ne’ebé ministru turizmu, halo akordu ho kompañia rua ne’ebé hakarak loke jogu kasino no otél iha nasaun ne’e.

Xefe Governu hatutan, bainhira akordu ruma ne’ebé akontese iha Governu ne’e kompeténsia boot Primeiru Ministru mak tenke foti desizaun, la’ós ministru mak foti desizaun ba atividade jogu sira ne’e.  

Read 249 times
Rate this item
(0 votes)
AdBottom1