Kofre Ministériu Saúde Mamuk Featured

By Pedro Alves Jullu 18, 2018 2259
Odete Veigas Odete Veigas

DILI: Impasse politika ne’ebé daudauk ne’e akontese fó efeitu boot ba ministériu sira, liliu ministériu saúde atu bele atende ba nesesidade ospital. Orsamentu duadesimu sei ezekuta hotu iha fulan ne’e.

Diretora Jeral Prestasaun Servisu(DGPG) Ministériu Saúde Odete Viegas hatete, daudauk ne’e ministériu saúde nia kofre mamuk.

Nia dehan, governu foun presiza tau atensaun ba problema ne’ebé ministériu saúde hasoru tanba servisu ne’ebé ministériu hala’o haree liu ba ema-nia vida.

“Ministériu saúde oras ne’e dadaun kofre mamuk tanba uza osan duadesimu. Fulan oin tenke hetan osan foun. Ema-nia vida labele halimar ho sistema birokrasia aas demais, presiza tau prioridade ba saúde nian. Ministériu saúde laiha osan adekuadu,” informa nia iha Hotel Timor, Tersa (17/07).

Kona-ba aimoruk iha portu no aeroportu ne’ebé seidauk bele hasai, Diretora ne’e dehan, Konsellu Ministru aprova ona osan balun atu bele hasai aimoruk kontentor lima (5) iha portu Dili.

Ho ida ne’e, Odete hein katak iha semana ne’e nia laran iha ona rezultadu.

“Aimoruk sira ne’e nesesariu no vital tebes atu bele halo tratamentu ba moras sira. Durante ne’e Hospital Nasional Guido Voladares enfrenta iha sala operasaun kona-ba cirurgia (operasi) nian,” informa Odete.

MS, nia hatutan, halo komunikasaun ho diretór ospital sira atu bainhira hasoru problema aimoruk bele husu apoiu fali husi ospital rejional sira hanesan Maubisse no Maliana.

Molok ne’e, Diretora Servisu Autonomu Medikamentus no Ekipamentu Saúde (SAMES) informa katak SAMES laiha osan atu hasai aimoruk husi portu Dili hodi bele fornese ba ospital nasional.

Atu bele atende problema menus aimoruk ne’ebé akontese iha ospital nasionál Guido Valadares, SAMES tenke empresta fali aimoruk husi ospital Rejiaun Autonomu Oekusse no klinika privadu sira hanesan Moris Foun, Foho Osan-mean, Estana Palma, no Betesta,

Diretora SAMES, Odete Maria Freitas Belo hatete, nia parte sosa ona aimoruk kontentor 10 ho aimoruk item 10 ne’ebé sosa husi Australia no India.

Aimoruk hirak ne’e, nia dehan, daudaun tama ona iha portu Dili no aeroportu Komoro, maibé SAMES iha posibilidade atu foti de’it kontentor rua ka tolu tanba osan la to’o atu selu taxa.

“SAMES rasik seidauk foti aimoruk kontentor tolu iha portu tanbá osamentu laiha no sistema freebalance osamentu ministeriu finansas oras ne’e dadaun taka,” informa nia iha knar fatin, Kampung Alor, foin lalais.

Nia dehan, nia parte hato’o ona karta ba diretór jeral ministeriu finansas nian, maibé seidauk hetan resposta.

SAMES, diretora ne’e dehan, tenke empresta aimoruk husi ospital Rejiaun Autonomu Oekusse no klinika privadu sira hodi bele fornese ba ONGV.

Nia hatutan, pedidu ba aimoruk nian barak liu mai husi ONGV nune’e aimoruk iha armajen stok laiha ona.

“Sira (ONGV) haruka karta mai, husu kona-ba aimoruk ba sala operasaun nian, maibé stok menus, (SAMES) empresta fali iha klinika privadu sira ne’ebé mak durante ne’e halo parseiru ho SAMES no mós ospital rejiaun autonomu Oekusse nian hodi apoiu ba ospital nasionl,” informa nia.

Daudauk ne’e, nia dehan, aimoruk iha SAMES sei disponivel, maibé iha item balun mak laiha.

“Aimoruk falta porsentu 22, tanbá oras ne’e dadaun aimoruk tinan 2017 fahe hotu ona, maibé (aimoruk) ba tinan 2018 nian seidauk to’o,” katak nia.

Rate this item
(0 votes)
Last modified on Kinta, 19 Jullu 2018 08:49

Independente Digital TV