Finalista Rihun 53 Resin sei Tuir Ezame iha Outubru Featured

By Elsa Belinha Setembru 03, 2019 3458
Eskola Bazika Filial Fatuhada hetan inundasaun iha tempu udan monu rai iha tinan 2018 Eskola Bazika Filial Fatuhada hetan inundasaun iha tempu udan monu rai iha tinan 2018

DILI: Iha fulan Outubru tinan ida ne’e finalista husi Ensinu Baziku to’o Ensinu Sekundaria na’in 53.101 sei tuir ezame nasional.

Husi númeru ne’e, finalista husi Ensinu Baziku hamutuk na’in 30.121, Ensinu Sekundaria Jeral hamutuk na’in 17.753, no Ensinu Sekundaria Vokasional hamutuk na’in 5.227.

Tuir kalendáriu Ministériu Edukasaun, Ezame Nasional sei hahú iha 14 to’o 16 Outubru, hafoin sei kontinua kedas ho ezame lokal.

Prosesu preparasaun Ministériu Edukasaun Juventude no Desportu (MEJD) hahú ona ho lansamentu pontus ezame nasional.

Durante fulan Setembru nia laran MEJD serbisu hamutuk ho Impresaun Nasional Timor Leste (INTL) sei halo impresaun ba pontus ezame nasionál.

Molok ne’e, MEJD serbisu hamutuk ho Koica halo prosesu impresaun ba pontus ezame nasional ne’e iha sentru impresaun MEJD, maibé ba tinan ne’e MEJD hakarak serbisu hamutuk ho INTL atu halo impresaun tanba ladun gasta osan barak.

Ministra Dulce hatete, MEJD serbisu hamutuk ho Prezidénsia Konsellu Ministru liu husi INTL hodi halo impresaun ba matéria ezame nasional.

“MEJD espera katak prosesu ba impresaun materia ba ezame nasional hahu ohin, kooperasaun entre MEJD ho INTL sei halo produz ba materia sira ne’e ho diak tanba instituisaun rua ne’e governu nian hotu,” dehan nia iha INTL Kolmera, horisehik.

Ministra dehan, konfidensialidade iha prosesu impresaun ne’e importante tebes, tan ne’e MEJD sei kontrola no halo avaliasaun durante prosesu tomak hodi garante katak serbisu hotu-hotu sei la’o ho di’ak.

Ba osan impresaun nian, Ministra Dulce de Jesus Soares informa, orsamentu ne’ebé MEJD aloka hamutuk rihun $100 resin. Tanba, nia esplika, funsionariu sira tenke serbisu hahú husi tuku 8 dader to’o tuku 8 kalan, tan ne’e presiza mós selu oras extra no osan ba hahaan.

Tuir regra, nia dehan, funsionariu ne’ebé envolve iha prosesu impresaun labele fila ba uma iha oras haan meiudia “Tanba ne’e presiza prepara ai-haan ruma atu garante ai-haan di’ak, saudável hodi bele serbisu no MEJD mós prepara transporte atu lori sira ba-mai durante iha prosesu tomak”.

Iha fatin hanesan, Diretór INTL Jaime Correia espera katak buat hotu sei la’o ho di’ak to’o tempu ne’ebé determina.

INTL, nia dehan, sei serbisu ho konfidensialidade no mós imparsialidade atu guarda segredu tomak kona-ba impresaun materia ba ezame nasional ne’e.

“Maske konfiansa ne’e foin hetan dala ida ne’e maibé antes iha ona esperiensia barak kona-ba impresaun. INTL Uza seguransa sivil atu kontrola funsionáriu tomak atu tama tenke halo pasarevista hodi garante seguru iha prosesu tomak,” nia dehan.

Rate this item
(0 votes)

Independente Digital TV