Sábadu, 23 Marsu 2019 | Login
Simblu FFTL ho Bandeira Timor-Leste Simblu FFTL ho Bandeira Timor-Leste

PM Rui: Governu Fasilita De’it, La’os Intervein FFTL Featured

DILI: Governu Timor-Leste afirma ninia pozisaun hodi la halo intervensaun ba Federasaun Futebol Timor-Leste (FFTL).

Primeiru Ministru, Rui Maria de Araujo hatete, governu nia papel mak atu fasilita hodi bele rezolve problema ne’ebé mosu, la’os atu halo intervensaun.

Deklarasaun PM Rui ne’e relasiona ho karta husi FFTL hodi responde ba konvite husi Sekretariu Estadu Juventude no Desportu ne’ebé husu ba FFTL atu partisipa iha enkontru entre SEJD, FFTL no klubu sira iha Liga Futebol Amadora (LFA).

Iha karta resposta ne’e, FFTL deklara lakohi atu partisipa iha enkontru triparti ne’ebé SEJD organiza, tanba konsider enkontru ne’e atu halo fali julgamentu popular ba FFTL, no konsidera SEJD atu halo intervensaun ba FFTL.

“Se Federasaun Futebol rasik lakohi partisipa iha enkontru triparti, governu la obriga. Tanba kestaun futebol ne’e afeita ba ema barak ninia vida, ema barak ninia atividade, entaun governu buka atu fasilita de’it, maibé la’ós atu intervein,” deklara PM Rui ba jornalista sira, iha Palasiu Governu, Sesta (17/02).

Molok ne’e, Sekretariu Estadu Juventude no Desportu (SEJD), Leovigildo Hornai konsidera karta ne’ebé FFTL haruka ba nia ladun iha baze fundamentu.

Leovigildo dehan, nia parte sei konvida fila fali FFTL atu bele hola parte iha enkontru triparti ne’ebé SEJD sei konvoka hafoin abertura ba Liga LFA epoka 2017 ne’ebé sei hala’o iha Baukau, Sabadu (18/02).

Read 653 times Last modified on Segunda, 20 Fevereiru 2017 10:22
Rate this item
(0 votes)

About Author