Segunda, 16 Dezembru 2019 | Login
FFTL Hetan Blacklist Husi AFC Kalbuadi Baixa iha Singapura

FFTL Hetan Blacklist Husi AFC Kalbuadi Baixa iha Singapura

DILI: Federasaun Futeból Timor-Leste (FFTL) ofisialmente hetan blacklist husi FIFA liu husi Asia Football Confederation (AFC) hodi labele partisipa jogu iha Kopa Ázia nian to'o tinan 2023. 

Sansaun ne'e FIFA hatún tanba identifika FFTL halo falsifikasaun ba dokumentu jogadór husi Brazíl. 

Bainhira kazu ne'e sei prosesa hela, tuir fontes konfirmadu hateten, Prezidente FFTL, Francisco Kalbuadi Lay hetan atake moras. 

Oras ne'e daudaun Kalbuadi ne'ebé mós nu'udar Ministru Turizmu halo hela tratamentu saúde iha Singapura. 

Deputadu Parlamentu Nasionál konsidera situasaun ne'e grave. Liga lokál konsege organiza di'ak ona, maibé agora tenke hasoru fali dezafiu foun tanba Timor-Leste labele joga iha eventu formál sira iha rejiaun ne'e. 

“Sansaun ne'ebé AFC fó sei empata ita atu tuir eventu internasionál ne'ebé AFC organiza,” dehan Virgílio Hornai, iha Uma Fukun PN, horisehik. 

Atu responde ba problema ne’e koletivamente organizasaun FFTL mak sei responsabiliza ba aktu ne'ebé halo to’o AFC espulsa FFTL.

Maibé, personalidade jurídiku ba ema sira ne'ebé sai hanesan autór sira ne’e mak tenke hetan responsabilidade. 

Problema ne’e akontese tanba FFTL halo falsifikasaun dokumentu ba jogadór Brazileiru na'in 12 ne'ebé halo naturalizasaun, maibé ho karakter falsifika sira nia dokumentu hodi sai hanesan timoroan.

Husu SEJD Klarifika

Entretantu, Komisaun F Parlamentu Nasionál husu ba Sekretáriu Estadu Juventude no Desportu (SEJD) atu esklarese situasaun ne’e ba povu bola mania sira iha Timor-Leste.

“SEJD tenke halo ona ezersísiu ruma atu bele halo aprosimasaun ba AFC kona-ba situasaun ne’e,” dehan Hornai. 

Tuir nia, ho situasaun ne’e lider asosiasaun desportu munisípiu sira tenke hamutuk ona ho SEJD atu bele halo ona konsensu ida atu kria kongresu estraordináriu atu bele hili lideransa foun FFTL. Nune’e Governu nia naran hodi husu ba AFC atu bele dispensa tempu ba FFTL atu bele rekupera nia situasaun.

LFA Husu Kongresu 

Klube Liga Futeból Amadora (LFA) husu boa vontade estrutura FFTL presiza halo kongresu estraordináriu, tanba sira komete halo falsifikasaun dokumentu ba jogadór naturalizasaun.   

Sekretáriu Jerál Klube Karketu, José Luis Oliveira hateten, FFTL tenke konvoka reuniaun para Asia Football Confederation (AFC) akompaña Timor-Leste ninia prosesu la hanesan intervensaun husi governu. 

Entretantu, iha fatin hanesan, Sekretáriu Jerál Klube SLB Laulara, Domingos Caeiro hateten, antes SEJD ba aprezentasaun iha Konsellu Ministru (KM), maizumenus iha ona dadus kona-ba sira nia grau no sansaun. Tanba atu responde situasaun para bele iha kbiit.

“Se lae ita ko'alia kona-ba kongresu, tuir loos kongresu ne’e ita halo iha ikus liu, ita responde asuntu boot uluk hodi responde sansaun ba AFC, hafoin ita bele ko'alia kona-ba kongresu,” afirma Domingos. 

Aleinde ne’e, Prezidente Liga Futeból Amadora, Nilton Gusmão hateten, espera estrutura FFTL ho fuan boot atu halo kongresu. Tanba ne’e liu husi enkontru atu fó hanoin ba sira katak, se sira iha boa vontade para atu rezolve problema ne’e. 

“AFC atu halo investigasaun mai iha Timor-Leste, ita nia governu halo ona esforsu hanesan halo enkontru, tanba ne’e Diretór Rejistu Notariadu mós hetan ona sansaun, ami nia arbitrajen mós tuir julgamentu ona, ne’e duni segundu julgamentu sei halo iha fulan-Marsu agora,” dehan Nilton. 

Maski nune’e, Sekretáriu Estadu Leovigildo Hornai hateten, governu hatene kazu sira ne’ebé akontese labele tolera ona. 

Kazu hirak ne’e laiha relasaun ho instituisaun federasaun futebol. Tanba krime ne'e ida-idak asume responsabilidade.

Iha fatin seluk, Ministru Planu Investimentu no Estratéjia, Kay Rala Xanana Gusmão hateten AFC kastigu ema barak hanesan Indonézia no fatin sira seluk. 

“Loloos ne’e AFC mak profisionál, uluk kompetisaun ita laiha, ita haruka Timnas haruka sira ba ne’e (sira husu), sira ne’e mai husi ne’ebé? Mais, prontu hakarak kastigu-tun kastigu-sa'e, kastigu ba, ita preokupa ho ita nian,” salienta Xanana.

Xanana reforsa, kona-ba problema ne’e ladún hatene loloos. Mais Indonézia mós simu, fatin barak simu ne’ebé lalika preokupa. Ne’e duni preokupa mak klube sira ne’e oinsá forma jogadór sira no buat sira seluk. 

Read 2432 times
Rate this item
(1 Vote)

About Author

MidAd1