Kuarta, 22 Novembru 2017 | Login
Logo FFTL Logo FFTL

Deskonfia ‘Máfia’ iha Kongresu Estraordináriu FFTL Featured

DILI: Sosiedade hadomi bola iha Timor-Leste ne’ebé hanaran AMANTE diskorda ho kongresu estraordináriu ne’ebé Federasaun Futeból Timor-Leste (FFTL) halo, tanba kongresu ne'e halo ho modelu bolu malu de’it.

Tuir informasaun, FFTL halo ona kongresu estraordináriu hodi hili Osório Florindo atuál deputadu parlamentu nasionál ba Prezidente FFTL no Nélio Isaac Sarmento atuál Sekretáriu Estadu Komunikasaun Sosiál (SEKomS) ba Sekretáriu Jerál.

Ne’e duni, tuir versaun AMANTE, kongresu estraordináriu ne’ebé sira halo ‘subar-subar’ de’it, tanba ema barak la hatene. Estrutura iha FFTL laran bolu malu depois konkorda malu troka estrutura tuir sira nia hakarak, la liu husi prosesu abertu.

Reprezentante AMANTE, José Luis Oliveira, kestiona makaas lejitimidade husi kongresu ne'e tanba la tuir lei.

“Ne’e buat ida ke ita kontra. Se ida ne’e kompañia privadu sira nian, sira nian ba… Mas ida ne’e patrimóniu públiku nian. Públiku nia sasán, tanba tau naran ne’e Timor-Leste. Ne’e duni tenke tuir regra,” dehan nia, iha Faról-Dili, horisehik.

José esplika, tuir regra normál asosiasaun sira, liuliu klube futeból, asosiasaun arbitrajen sira tenke partisipa. Maibé, iha kongresu estraordináriu foin lalais la envolve komponente sira ne’e.

Tuir nia, loloos FFTL tenke matan moos ona ba máfia ne’ebé durante ne’e akontese ona hanesan sansaun husi AFC ba sekretáriu jerál anteriór, inklui diretór balun no prezidente arbitrajen ne’ebé ema kaer iha Singapura, labele repete beibeik erru sira ne’e.

“Mai ha’u laiha lejitimidade. Agora to’o ona tempu governu atu foti pozisaun ida ne’ebé ke forte. Sira dehan governu la mete iha ne’e, ne’e ami organizasaun FIFA… maibé oinsá ho Kalbuadi no Nélio Isaac ne’ebé nu’udar membru governu envolve iha organizasaun ne’e,” tenik nia.

Nia hateten, presiza tebes governu intervein hodi salva de’it patrimóniu estadu, labele husik FFTL atu kontinua pratika ilegál, depois estraga naran di’ak nasaun Timor-Leste.

Responde ba kestaun ne’e, Nélio Isaac Sarmento hateten, estrutura ezekutivu FFTL foti nia nu’udar sekretáriu ezersísiu atu responsabiliza kona-ba servisu operasionál administrasaun iha FFTL nian.

Nia esplika, prezidente FFTL, Francisco Kalbuadi Lay ninia kondisaun saúde ladún di'ak, tan ne'e indika fali Osório Florindo assume kargu prezidente ezersísiu para kontinua atividade desportu la'o nafatin.

“Ita halo mudansa estrutura husi prezidente no sekretáriu jerál ita tenke fó hatene uluk organizasaun FIFA hanesan AFC ho AFF para sira hatene ona katak, FFTL bainhira hetan sansaun ba Sekretáriu Jerál halo mudansa internal ho kondisaun prezidente FFTL hodi hatama fali ema ne’ebé asume kargu hanesan,” dehan nia.

Nia reforsa, ho situasaun ne’e FFTL informa ba órgaun sentrál sira atu fó hatene no fó tempu ba prezidente Osório atu fó konsentrasaun hodi haree situasaun ba problema sira ne’ebé mosu iha FFTL laran.

“Agora ami servisu hela, halo normalizasaun ba iha FFTL no oinsá atu halo preparasaun ba kongresu bazeia ba estatutu FFTL nian rasik,” dehan nia.

Ne’e duni, la taka dalan iha tempu oin mai sei realiza kongresu normál hanesan baibain.

Read 1292 times Last modified on Kinta, 30 Marsu 2017 09:49
Rate this item
(0 votes)

About Author

  • MidAd1
  • Heineken Klaran
AdBottom1