Print this page

Polisia Kaptura Autor Loke Bola Guling Ilegal Featured

By Tomé Amado Fevereiru 24, 2018 1126
Jogu bola guling Jogu bola guling

DILI: Komandu Polisia Nasionál Timor Leste (PNTL) Munisípiu Dili, kaptura ema na’in rua tanba envolve iha loke atividade jogu ‘bola guling’ ilegalmente.

Suspeitu na’in rua ne’e oras ne’e daudaun detein hela iha sela komandu Dili. Nune’e, prende mós meza sasán ne’ebé sira utiliza hodi loke jogu ne’e nu’udar evidénsia atu aprezenta ba Ministériu Públiku (MP).

Komandante daruak PNTL Munisípiu Dili, Superintendente Asistente Euclides Belo hateten, suspeitu ne’e sei kumpre oras 72, depois sei aprezenta ba interrogatóriu dahuluk iha Tribunál Distritál Dili (TDD).

Nia hateten, bainhira atu loke jogu tenke hetan uluk lisensa husi ministériu kompetente, kuandu laiha polisia la tolera jogu ilísitu atu loke iha públiku.

Ita iha ona lei ne'ebé rigorozu regula kualkér jogu sira. Ne'e duni, se mak la kumpre lei polisia kaptura depois prosesu tuir prosedimentu legál”, tenik nia, iha servisu fatin, Kaikoli-Dili, horisehik.

Kapturasaun ba jogu ilísitu ne’e hala’o iha área Postu Administravu Vera Cruz, (21/2).

Atu halo sidade Dili sai di'ak no tuir ordenamentu, polisia kontinua vijilánsia nafatin hodi akompaña movimentu jogu sira iha kapitál ne’e.

Aleinde ne’e, komandu Dili mós detein ema na’in haat seluk ne’ebé envolve iha krime diferente. Na’in rua komete kazu falsifikasaun produsaun xapa matríkula, ida krime violénsia doméstika no ida seluk, tanba mandatu kapturasaun ba kazu anteriór.

Entretantu, polisia kontinua kumpre servisu hodi nafatin kumprimenta ba regulamentu sira ne'ebé hatuur ona iha lei.

Rate this item
(0 votes)