Print this page

ONU Lamenta Desizaun PN Featured

By Cristina Ximenes Setembru 20, 2019 8936
ONU. Foto google ONU. Foto google

DILI: Organizasaun Nasoins Unidas (ONU) lamentavel tebes ho desizaun Parlamentu Nasionál Timor-Leste, ne’ebé la aseita viajen Prezidente Repúblika, Francisco Guterres ‘Lú Olo’ nian hodi partisipa iha Asembleia Jerál ONU.

 

Lamentasaun ne’e hato’o direta husi Reprezentante ONU iha Timor Leste, Roi Trivedy, bainhira hasoru malu ho Xefe Estadu, iha Palásiu Prezidensiál, Bairru-Pité, horisehik.

Ha’u hanoin desizaun kona-ba asentasaun ne’e lamentavel tebes, tanba reuniaun iha Novaiorke ne’e importante tebe-tebes”, dehan nia.

Ne’e duni, espera PN ho Prezidénsia Repúblika bele rezolve lalais diferensa sira, hodi nune'e TL bele iha reprezentasaun iha nivel apropriadu, tanba enkontru sira hanesan ne'e importante tebes ba dezenvolvimentu nasaun nian.

Nia esplika, reuniaun sira ne’e balun sei trata asuntu importante sira hanesan mudansa klimátika, finansas, dezenvolvimentu, saúde primária ho objetivu dezenvolvimentu sustentavel (ODS).

Trivedy hatutan, desizaun importante barak maka halo durante reuniaun ne’e no mós iha marjen ba reuniaun Asembleia Jerál nian. Tanba ne’e, lakon boot bainhira TL laiha reprezentante altu nivel durante reuniaun ne’e.

Reprezentante ONU iha TL mós reitera katak, ONU sei prontu nafatin atu asiste TL iha dezenvolvimentu.

Rate this item
(0 votes)