Print this page

Xanana Apoiu Lu-Olo ho Kompromisu Politika Saida?

By INDEPENDENTE Janeiru 28, 2017 3346
Catur Politika Catur Politika

Kandidatura Prezidente Repúblika (PR) ofisialmente na'in lima mak deklara-aan ona hanesan José Neves 'Samalarua', António Maher 'Fatuk Mutin', Amorin Vieira, Flaviano Fernandes, no Francisco Guterres 'Lu-Olo'.

Husi Kandidatu na'in lima ne'e, pesoál Kay Rala Xanana Gusmão fó apoiu liu ba ema ne'ebé nia haree hanesan nia-alin. Ema ne'e mak Francisco Guterres 'Lu-Olo', kandidatu Prezidente Repúblika husi Partidu FRETILIN.

Haree husi figura kandidatu sira ne'e hotu, kandidatu Partidu FRETILIN iha vatajen boot liu tanba fatór lubuk ida, liuliu esperiénsia polítika ne'ebé maduru liu hahú husi organizasaun to'o órgaun soberanu sira.

La la'o hamutuk ho ema ruma mós Lu-Olo sai nu'udar kandidatu favoritu. Haree fila-fali ba kotuk estatístika militante Partidu FRETILIN nian rasik atinji ona 290.000 eleitór iha eleisaun lideransa partidu nian.

Ne'e duni, la'ós novidade foin kuan Lu-Olo eleitu sai Prezidente Repúblika ba dala lima (5) ho períodu ukun 2017 to'o 2022.

Maski nune'e, labele haluha mós influensia Maun Boot (MB) Xanana nian. Iha 2007 konsege duni lori Jose Ramos Horta nia ba Palasiu Ai-Tarak Laran.

Nune’e, iha 2012 mós hanesan, bainhira la’o hamutuk ho Taur Matan Ruak, Xanana konsege hatún Lu-Olo iha segunda ronda.

Tanba ne’e labele haluha katak MB Xanana mak sei halo senáriu hirak ne’e hotu. hakarak manan absolutamente la ho segunda ronda tenke kaer metin nafatin MB Xanana.

Lu-Olo iha ona odamatan vitoria tanba agora daudaun MB Xanana deklara ona fó apoiu ba Lu-Olo. Maibé, sai pergunta mak ne'e, kompromisu polítika saida mak Xanana halo ho FRETILIN?

Iha polítika laiha buat ida mak gratuita. Sempre iha kompromisu balun ne'ebé haksumik-aan hela, satan iha palku polítiku ema sira ne'e koñese malu di'ak loos.

Kompromisu saida de'it mak halo entre MB Xanana ho FRETILIN parte ida husi realita polítika. Importante liu ba povu saida de'it mak imi halo tenke fó benefísiu no vantajen ba povu Timor-Leste.

Tenke tau iha polítika katak, povu barak sei moris ki'ak, tanba ne'e sira hakarak ona atu livre husi mukit. Ita hotu hein katak kompromisu ne'ebé lideransa antigu sira ne'e halo sei lori milagre ba povu Timor iha 2017 ne'e ba oin. ITA HEIN... 

Rate this item
(1 Vote)
Last modified on Sábadu, 28 Janeiru 2017 12:12