Print this page

Parpol 13 Foti ona Formuláriu Kandidatura Featured

By Marsu 07, 2018 1387
Kampanye partido politiku sira Kampanye partido politiku sira

DILI: Partidu polítiku hamutuk 13 mak foti ona formuláriu lista kandidatura nian hodi hatama naran ba konkorre iha eleisaun antesipada (EA), iha Tribunál Rekursu (TR).

Partidu sira ne’ebé foti ona formuláriu lista kandidatura nian maka hanesan partidu União Demokrátiku Timorense (UDT), Partidu Unidade Dezenvolvimentu Demokrátiku (PUDD), Frente Mudansa (FM), Partidu Dezenvolvimentu Nasionál (PDN), Congresso Nacional Reconstrução Timor-Leste (CNRT), Partidu Republikanu (PR), Movimentu Libertasaun Povu Maubere (MLPM), Asosiasaun Populár Monarkia Timorense (APMT), Partidu Demokrátika Repúblika Timor (PDRT), Partidu Miléniu Demokrátiku (PMD), Partidu Traballista, Partidu Libertasaun Populár (PLP), partidu Frente Revolusionáriu Timor-Leste Independente (FRETILIN).

Maski partidu polítiku sira ne’e foti ona formuláriu lista kandidatura nian, maibé seidauk iha partidu ka koligasaun ida maka aprezenta sira nia lista parlamentu nasionál nian ba Tribunál Rekursu.

Husi partidu polítiku hirak ne’ebé iha, koligasaun balun ne’ebé hahú mosu ona iha públiku iha tolu maka hanesan Aliansa Mudansa ba Progresu (AMP) kompostu husi CNRT, PLP no KHUNTO, nune’e koligasaun Frente Dezenvolvimentu Demokrátiku [FDD] kompostu husi PUDD, UDT, FM no PDN, ikus liu maka koligasaun Movimentu Dezenvolvimentu Nasionál (MDN) kompostu husi APMT, PLPA, MLPM no UNDERTIM.

Nune’e, Partidu sira ne’ebé poténsia atu la'o mesak ba eleisaun antesipada maka hanesan FRETILIN, PD no PEP. Entretantu, partidu sira seluk seidauk iha konfirmasaun klaru.

Prezidente Tribunál Rekursu, Deolindo dos Santos hateten, aprezentasaun lista kandidatura iha ninia prazu tempu, ba partidu polítiku sira nian hahú loke iha 20 Fevereiru 2018 to’o 21 Marsu 2018. 

Rate this item
(0 votes)
Last modified on Kinta, 08 Marsu 2018 14:29
Martinha Gusmao

Latest from Martinha Gusmao