Tuir Ministru Koordenador Asuntus no Ekonomika (MKAE), Joaquin Amaral agradese tebes ba governu Xina liu husi ninia Embaixada ba Timor-Leste hanesan simbolikamente intrega armajen rua ba Governo no povu Timor-Leste.

“Armajen rua ne’ebé intrega mai ita ne’e, ida iha Baucau no ida seluk iha NatarBora, lolos seremonia ne’e iha fatin armejen maibé ho situasaun serka sanitaria impede ita labele halo iha ne’ebá,”dehan nia iha salaun Trade Invest Colmera Dili,(29/04).

Nia hatutan, kompaña Xina mak sei halo konstrusaun ba armajen rua ne’e no sei kontinua tau matan ba instalasaun to’o tinan ida ho nia manutensaun durante tinan rua.

Nia informa, armajem sira ne’e sei kompleta ho makina halo prosesamente ba haré hodi simu kedas ba iha karon laran, hanesan ho industria iha nasaun sira seluk.

Nune’e kada armajen ida bele akumula sasan ho toneladas rihun 5 ho makina ne’ebé tau iha laran hodi  prosesa haré loron ida to’o 20 toneladas.

Nia akresenta, montante osan ba konstrusaun armajen ne’e hamutuk dolar amerikanu tokon $24, ne’ebé ajuda husi Governo Xina  ba povu Timor-Leste.

Nune’e, povu Timor-Leste iha obrigasaun mak atu fó rai hodi dada bee-mos ba instalasaun eletrisidade.

Iha Fatin hanesan Ministru Agrikultor no Peskas (MAP), Pedro dos Reis mós agradese ba Governo no povu Xina ne’ebé intrega ona armajen rua kompletu ho makina prosesamentu.

Tanba ne’e MAP planu ona atu oinsa bele halo natar iha tinan ida dala-rua, maibé problema mak bee la sufisiente.

Entretantu, natar sira ne’ebé agora povo sira kuda dadauk ne’e hamutuk rihun 23 hektares, maibé iha inundasaun foin lalais ne’e estragus kuaze rihun 820 hektares.

Jornalista:Saturnina da Costa

Editor:Jose Sarito Amaral