Diretór Jeral Dezenvolvimentu Rural, Rosito Guterres hatete, bainhira inundasaun akontese iha loron tolu mai oin, parte Ministériu Adminiatrasaun Estatal (MAE) halo kedan intervensaun emerjénsia hodi identifika fatin evakuasaun sira ne’ebé vitima sira hela hamutuk 44.

“Kuandu inundasaun akontese iha loron tolu oin mai ami halo intervensaun emerjensia sira hodi identifika ita nia sentru refujiadus ne’e hamutuk 44, maibé to’o gradualmente lao komesa redus ona, no agora dadauk sentru refujiadus hela de’it ona 30 mak ativu no ita tau matan hela,”dehan nia iha knar fatin, MAE, Colmera, (23/04).

Entretanto, familia uma kain sira ne’ebé afetadu ba inundasaun iha teritoriu Timor laran tomak hamutuk rihun 28.734.

Entre munisipiu sira, iha Dili uma kain rihun 25.881, munisipiu Lautem 80, Aileu 167,  Ainaro 301, Baucau 90, Vikeke 472,  Kovalima 120,  Bobonaro 156,  Likisa 427, Ermera 92, Manatuto 441, Manufahi 114 no Oecuse 393.

Nune’e MAE mós halo ona levantamentus ba dadus, liu husi Xefe Suku sira no Xefe Suku sira lori formatu ba priense hodi identifika komunidade sira ne’ebé hetan uma no sasan sira ne’ebé estragus.

Hodi hetan klasifikasaun ba sasan sira ne’ebé estragus hanesan, estragus moderadu ka estragus total, ida ne’e MAE sei identifika hotu.

Nia akresenta, munusipiu Ataúro mak lista seidauk tama. Iha kapital Dili entre Suku 36, iha Suku 8 mak afeitadu liu hanesan, Suku Hera, Madohi, Kristo Rei, Camea, Bidau Santana, Comoro, Tasi-Tolu, no 12 Novembru.

Jornalista: Saturnina da Costa

Editor: Jose Sarito Amaral