Vise PM ne’e dehan, nia fó ona orientasaun ba Ministra Saúde (MS), Elia dos Reis Amaral, Vise Ministru Fortalesimentu Instituisionál Saúde, José Mango dos Reis, no Vise Ministru Operasionálizasaun Ospitál, Flávio Brandão, atu tau atensaun másimu.

"Ita forma ekipa no orienta daudaun ona ba Ministra Saúde no nia Vise Ministru atu sira presiza halo fumigasaun no tenke fó atensaun másimu ba ida ne'e, nune'e ita bele salva, liu-liu ita-nia oan sira, tanba sira mak futuru nasaun nia," dehan Assanami, iha salaun MSSI, Kaikoli (03/02).

Nia dehan, durante ne'e MS iha métodu hodi halo fumigasaun iha fatin sira ne'ebé prioridade ka afetadu, maibé dengue nafatin rejistu ho númeru aas, tanba ne'e governu kontinua buka dalan hodi rezolve situasaun refere.

"Maibé mós ita husu ba inan-aman sira atu kontrola oan sira, liu-liu ijiene iha uma laran no uma sorin sira ne'e, tanba susuk ne'e gosta moris iha bee nalihun sira, ka fatin ne'ebé iha espasu ba susuk atu moris,” dehan nia.

Kona-ba ai-moruk fumigasaun stock hotu, Vise-PM klarifika, katak tuir informasaun husi Institutu Nasionál Fármasia no Produtu Médikamentu  (INFPM) aimoruk sei iha no balun sei iha dalan.

"Sira informa katak aimoruk balun iha hela, balun sei to'o tan mai, ne'ebé hein katak aimoruk sufisiente par ita hasoru dengue ida ne'e. Ita espera ekipa bele halo servisu ida ne'e ho efetivu."

Aleinde ne’e, Assanami dehan, iha tempu badak sei bolu WHO atu oinsá bele fó apoiu ba ekipa integradu hodi haree kazu ne’e.

Hakarak lee notisias nee kompletu, asesu deit pajina e-paper INDEPENDENTE: https://digital.independente.tl edisaun kuarta (04/02).