Vise Xefe Estadu Maior Jeneral F-FDTL, Major Jeneral Calisto Santos ‘Coliati’ husu ba ofisiál foinsa-sa’e sira atu hahú prepara hodi kaer knaar lideransa iha instituisaun defeza nasionál.

“Ami katuas sira ne’e iha ona reforma, ami sei husik hela instituisaun ida ne’e ba iha ita-boot sira-nia liman,” dehan nia Coliati iha ambitu atribuisaun medalla no promosaun postu diviza iha Kuartel Jeneral F-FDTL, Fatuhada, Dili, Sesta (13/02).

Tuir nia, fututu lideransa F-FDTL sei entrega ba jerasaun foun sira, maibé sei avalia liu-husi sira-nia komportamentu, lealdade, displinar, no track record servisudurantetinan 25 ezistensia F-FDTL.

Jerasaun foun prontu

Xefe Estadu Maior Brigadeiru Jeneral José da Costa Soares ‘Trix’ esplika katak maioria veteranu ne’ebé mai husi ailaran daudauk ne’e ho idade tinan 60 ba leten no sei tama ba idade reforma bazeia ba lei.

“Tama ba tinan 2027 ne’e veteranu sira ne’ebe mai husi ai-laran ne’e tama hotu ba reforma no balu sei mantein iha rezerva,” dehan nia.

Tanba ne’e, futuru instituisaun F-FDTL sei entrega ba jerasaun foun sira hodi lidera.

Nia afirma katak, prosesu transmisaun hahu kedas iha tinan 2000 no agora tenke fó ba jerasaun foun.

“Tenke fó ona jerasaun foun ka’er tanba sira brani hatudu ona, krize 2006 sira mak la’o hamutuk ho ami katuas sira luta mantein ita-nia estabilidade. Biar balu la matenek, maibé balu matenek tiha ona, balu ba eskola iha Xina, Australia no Amerika, ita labele dehan sira laiha kapasidade,” katak nia.

Tuir Trix, Komando mós fihir ona ofisiais superior no koronel sira husi jerasaun foun atu lidera F-FDTL, tanba balu hatudu ona ninia pratika lealdade no balu ba eskola ona iha rai li’ur.

“Ba ha’u ne’e dehan katak sira preparadu, orsida to’o pratika ne’e mak ita haree,” dehan nia.

Editor: Jorgino dos Santos