Xefe Governu deklara assuntu ne’e, hafoin halo audiénsia ho Prezidente Repúblika Francisco Guterres Lú Olo, kinta (6/5) , iha Palasio Presidensiál, Hudi Laran Dili.
Iha hasoru malu ne’e, PM Taur informa ba Xefe Estadu kona-ba vasina ne’ebé hetan husi Governu Australia no Xina sei fó prioridade ba munisípiu Díli ne’ebé ohin loron sai episentru Covid-19 hodi hadaet ba munisípiu seluk.
Timor-Leste hetan apoiu vasina husi insiativa multilateral COVAX ne’ebé kobre 20 porsentu husi total populasaun no 80 porsentu seluk sei oferese husi Governu Australia no Xina.
“Horseik mai rihun 20 mai husi Australia, dia 19 sei mai tan rihun 10. Buat hotu di’ak, sistema COVAX nian, foin dadaun simu rihun 24, sei mai rihun 38. Se la’ós fulan ida ne’e, prinsípiu Juñu nian ita sei simu rihun 100 husi Xina. Ne’e besik rihun 190 ba fulan maiu no juñu. Ne’e pasu di’ak. Konsentrasaun vasina sei iha Díli mak barak liu,”PM hateten, liu husi komunikadu husi Gabinete Presidente Repúblika, ne’ebé Online Independente asesu.
Vasina ba Timor-Leste hetan husi inisiativa multilateral COVAX, Governu Australia no Xina. Maibé bainhira nesesita, Timor-Leste bele sosa rasik, Primeiru Ministru hateten:
“Ita iha osan. Iha orsamentu ne’e ita tau osan ba vasina. Ita simu apoiu, bainhira nesesariu ita sosa, ita mós sosa.”
Iha fulan marsu tinan ne’e, Governu nia previzaun loron ida sei akontese kontajen komunitaria. Iha fulan abril Díli iha ona kontajen komunitária no munisípiu sira kontinua ho kontajen lokal tanba ne’e halo preparativu atu hasoru situasaun ne’e.
“Governu hatene katak loron ida ba loron ida, kazu aumenta, fatin izolamentu sira, fatin kuarentena sora sei fatin laiha ba ema. Saida mak Governu halo Governu deside iha implementaun estadu emerjensia, inklui mos auto kuarentena no auto izolamentu. Ema ne’ebé ninian uma iha kondisaun bele halo de’it iha uma. Auto izolamentu no auto kuarentena iha ne’eba. Ida ne’ebe laiha mak ita tau iha fatin sira, ” Primeiru Ministru esplika.
Governu implementa medidas liuhusi halo teste masal ba sidadaun sira Díli hodi bele deteta moras koronavirus. Tanba ne’e Xefe Governu husu atu sidadaun sira koopera hodi tuir teste masal.
“Ha’u husu ita-nia komunidade sira apoia atu hamenus numeru aleinde ita avansa ho vasina. Atu bele minimiza nia risku bai ta-nia sidadaun sira,” Primeiru Ministru esplika.
Díli ne’ebé sai episentru moras coronavirus kazu kumulativu, tuir Sentru Integradu Jestaun Krize desde marsu 2020-to’o horseik, hamutuk 2386.
Governu sei fó apoiu finanseiru ba sidadaun sira tanba efeitu husi Covid-19 no dezastre naturais.
“Subsidiu ba familiar sira. Semana ne’e Prezidente Repúblika promulga (Orsamentu Jerál Estadu). Ita agora halo hela preparativu. Semana oin, ba oin sei implementa. Iha fulan maiu komesa halo implementasaun,” Xefe Governu hateten.
Asistente Editor: Saturnina da Costa