Reprezentativu UNICEF, Bilal Aurang Zeb Durrani hatete, UNICEF ho Governo Japaun hakarak exponensialmente alarga liu tan kapasidade armazenamentu Ministeriu Saúde no fasilidade armazen SAMES.

“Hamutuk ho ita nia apoiu uluk nian no kamara foun frigorifiku atu nune’e, SAMES bele tau vasina liu tokon ida iha momentu ne’ebé deit,”dehan nia iha Salaun SAMES, Kampu-Alor, sesta horseik (17/09).

Enkuantu, ba kapasidade korenti malirin iha armazen rejional sira ne'e, importante atu fortalese sistema saúde no konstrusaun sistema saúde iha nivel sub-nasional sira liu-liu iha Rejiaun Administrativu Espesial Oecuse Ambeno (RAEOA), Ainaro, Baukau no Bobonaro.

Entretantu, Ministra Saúde Odete Maria Freitas Belo, agradese ba Governu Japaun ho UNICEF ne’ebé apoia ona ekipamentus korenti malirin ba MS liu husi SAMES, nune’e bele mellora liu-tan kapasidade armazenamentu no trasportasaun iha nivel rejional.

Aleinde, UNICEF ho Governu Japaun mós apoia ekipamentus hanesan, sala malirin 4, estabilizador tensiu 5, etiquetas jeladeira ba monitorizasaun temperatura 500 no laptop hamutuk unidade 20.

Ekipamentus sira ne’e sei uza iha armaze rejional no Munisipiu sira, hodi asegura vasina to’o ba populasaun hotu iha teritoriu laran tomak.