Print this page

UNESCO-KOICA Entrega Livru 90.108 ba MEJD

By Rufino Dos Santos Barreto Outubru 25, 2021 377
Embaixadór Korea iha Timor-Leste, Kim Jeong Ho hamutuk ho ekipa entrega livru ba Ministru Edukasaun Juventudi no Desportu, Armindo Maia, iha salaun MEJD, Vila Verde, (25/10). Foto:Rufino/INDEPENDENTE. Embaixadór Korea iha Timor-Leste, Kim Jeong Ho hamutuk ho ekipa entrega livru ba Ministru Edukasaun Juventudi no Desportu, Armindo Maia, iha salaun MEJD, Vila Verde, (25/10). Foto:Rufino/INDEPENDENTE.

DILI: Governu Korea liu husi Korea International Coorporation Agency (KOICA) iha Timor-Leste hamutuk ho United Nations Education Scientific and Cultura Organization (UNESCO), entrega livru 90.108 ba Ministeriu Edukasaun Juventude no Desportu (MEJD), hodi fasilita estudante ensinu baziku iha siklu tolu.

Enkuantu, livru sira ne’e, akumula materia hanesan, matematika ho siensia.

Ministru Edukasaun Juventude no Desportu (MEJD), Armindo Maia hatete, livru ne’e fasilita ba estudante sira atu sira iha livru rasik hodi estuda.

“Hanesan ita hotu hatene livru ne'e sai prioridade tebes, mehi MEJD nian hakarak kada aluno ida, iha livru rasik para sira estuda iha uma. Tanba situasaun pandemia Covid-19 ne'e, ita hotu hatene estudante sira asesu internet susar, entaun livru ida ne'e fó ba sira hodi estuda iha uma,”dehan nia iha salaun enkontru MEJD, Vila Verde, segunda ne’e (25/10).

Iha fatin hanesan, Embaixadór Korea iha Timor-Leste, Kim Jeong Ho, hatete, livru ezersisiu matematika ho siénsia ne'e dezenvolve husi post-projeitu iha Timor-Leste.

Post-projeitu ida ne'e mak, atu utiliza iha sistema tranzisaun nasionál hodi bele oferese edukasaun sientífiku ba labarik sira iha eskola, no apoiu sira ne’e bele hetan servisu edukasaun ne’ebé ho kualidade.

Nune’e, ho situasaun Covid-19 ne'ebé halo eskola sira taka, entaun projetu ida ne'e ajuda tebes hodi dezenvolve no transmite programa edukasaun nasionál sira. Husi destribuisaun material sira ne’e, kontribui makas no fó oportunidade ba estudante sira hodi bele kontinua aprende .

“Ha’u agradese ba MEJD ho UNESCO iha Timor-Leste, maske iha situasaun serka sanitaria no estadu emerjensia, maibé imi nafatin kontinua esforsu hodi dezenvolve asuntu edukasaun nian.”tenik nia.

Antes ne’e, iha tinan 2010 to’o 2019 Governu Korea distribui ona livru ho lian tetum ba estudante sira. Maibé apoia ne'e seidauk sufisiente, nune’e, KOICA iha hanoin ida atu lori estudante sira ba ambiente ida diak hodi bele asesu ba edukasaun ne’ebé ho kualidade.

Entretantu, orsamentu ne’ebé aloka ba iha livru sira ne’e hamutuk dolar amerikanu tokon U$2.4.

 

Asistente Editor: Saturnina da Costa

Rate this item
(0 votes)