Deputadu Antonio is kotu iha Hospital Nasionál Guido Valadares (HNGV) iha Sabadu kalan (20/09), haleu tuku 22.00. Nia mate ho idade tinan 57.
“Rezultadu votasaun votu pesar a favor 52, kontra 0, no abstensaun 0. Ho nune'e votu de pesar pasa ho unaminidade,” dehan Prezidente Parlamentu Nasionál, Maria Fernanda Lay, iha plenaria, Segunda (22/09).
Bankada hotu sente lakon
Kondolensia ba deputadu Antonio mai husi bankada hotu-hotu. Deputada bankada CNRT ne’ebé mós nu’udar Prezidente Komisaun F trata asuntus Saúde Seguransa Sosiál no Igualdade Jéneru, Maria Goru Mali Barreto hatete, PN no Komisaun F sente triste tanba lakon deputadu di’ak ida.
"Durante ita-boot iha Parlamentu Nasionál, Deputadu ida ne'ebé mai ho nia misaun ne'ebé forte, tau interese nasionál ne'ebé mak aas liu, ida ne'e ita-boot hatudu tantu iha plenaria ida ne'e, no mós iha Komisaun. Ami la nega ita-boot ninia di'ak tomak," dehan Prezidente Komisaun F ne’e.
Nu’udar deputada CNRT, Maria mós lori estrutura nasionál no munisípiu, militantes no simpatizantes Partidu CNRT nia naran hato'o sentidu profunda kondolensia ba partidu Khunto tanba lakon nia kuadru di'ak ida.
“Lori CNRT mós hato'o sentidu kondolensia ba família tomak Deputadu António Verdial da Silva Ferreira nian. Espera kontinua forsa hodi simu realidade dolorozu ida ne'e, maske situasaun defisil maibé fiar katak familia forsa hodi simu realidade tristeza ida ne'e,” dehan nia.
Kondolensia profunda hato’o mós husi Deputadu Bankada Partidu Demokrátiku (PD), Armando Lopes. Nia konsidera matebian husik hela ain-fatin ne’ebé forte iha istoria PN nian.
“Dedikasaun Deputadu António, nia espiritu serbisu sei moris nafatin iha uma memoria Parlamentu Nasionál ho istória polítika Timor-Leste nian. Hodi Bankada no Militantes PD hato'o kondolensia sinseiru ba família einlutada no Partidu Khunto.”
Xefe Bankada Partidu Frente Revolusionariu Timor-Leste Independente (FRETILIN), Aniceto Longuinhos Guterres sublina katak mate nu’udar mistériu ne’ebé ema ida labele hases an. Hotu-hotu sei liu iha dalan ne’e, kestaun tempu de’it mak diferente.
"Saida mak akontese ba ita-nia kolega no amigu Deputadu António Verdial da Silva Ferreira ne'ebé mate derepente, halo ita hotu hakfodak, hanesan supreza boot ida,” dehan nia.
Bankada Fretilin hato'o profunda sentidu kondolensia ba família enlutada no ba partidu Khunto ne'ebé lakon ninia polítiku importante ida.
"La haluha mós ami-nia solidariedade boot ba nia kaben, oan, no beioan sira iha momentu defisil ida ne'e. Ita hotu reza atu Aman Maromak simu nia iha Kadunan Santu. Adeus, Saudozu Deputadu António Verdial da Silva Ferreira," katak nia.
Deputada Bankada Partidu Libertasaun Populár (PLP), Hermenegilda da Costa Laurentina hatete, TL lakon tan membru di'ak ida ne'ebé hola parte hodi dedika nia aan no fó nia kontribuisaun direita liu husi Parlamentu Nasionál.
"Lori PLP nia naran no ha'u-nia naran rasik espresa ami-nia profunda pesar ba falesimentu kompaineru Deputadu António Verdial da Silva ne'ebé Maromak bolu lais tebes husi ita hotu nia leet," dehan nia.
Khunto lutu
Husi parte Khunto, Xefe Bankada António Verdial Sousa hatete katak, partidu Khunto daudauk ne’e iha Lutu Metan.
"Ami Bankada Khunto deklara katak ohin Bankada no Partidu Khunto lutu metan ida ne'ebé triste ho matan-been no familia boot KORK lakon lideransa ida ne'ebé di'ak tebes,” dehan nia.
Bainhira Partidu Khunto harii, Maktoban mós hanesan Konseleiru Nasionál ida ne'ebé fó vida no forsa tomak oinsá bele organiza militante sira iha teritoriu nasionál.
Ain-fatin no luta
António Verdial da Silva Ferreira, moris iha Ainaro, 30 Maiu 1968. Desde joven, nia ativu iha mundu desportu no hetan mós nomeiasaun nu’udar membru núkleu ba organizasaun Kmanek Oan Rai-Klaran (KORK).
Nia partisipa iha luta rezisténsia klandestina no prosesu libertasaun nasionál Timór Lorosa’e nian iha tinan 1987 no 1988.
Iha tinan 1999, Antonio ne’ebé mós nu’udar sobrevivente ida husi masakre Mantasiuina nian, Aroina, hamutuk ho Konselleiru Máximu partidu KHUNTO, José dos Santos Naimori Bucar, mobiliza massa sira iha propaganda polítika kona-ba prosesu referendu nian.
António nu’udar fundadór ida ba Partidu Khunto iha tinan 2010 no hala’o kna’ar nu’udar Konselleiru Nasionál. Nia eleitu nu'udar membru Parlamentu Nasionál iha eleisaun parlamentár 2023, sai hanesan Vise Prezidente ida hosi partidu nia kaukus parlamentár ba VI Lejislatura, ne'ebé hahú iha tinan ne'ebá.