Tuir Sekretaria Estadu Protesaun Sivil (SEPS), Joaquim Gusmào hatete, apoiu hirak ne’e husi maluk Timor oan sira ne’ebé servisu iha Australia iha Program WPS.

“Aviaun ne’ebé mai ne’e ita nia NGO no parseiru sira husi Australia ho ita nia alin sira iha Australia, ne’ebé ajuda umanitaria mai ita, no sasan hirak ne’e kahur, sasan ba apoiu  Covid-19 nian no sasan apoiu ba dezastre nian,”dehan nia iha Aeroportu Nikolau Lobato, Komoro, (12/04).

Tanba ne’e ohin mai iha ne’e atu simu sasan sira ne’e atu bele enkamiña ba parte saúde nian no mós ba parte protesaun sivil nian.

“Antes ne’e governu Japaun fó ajuda ona ita iha horseik (11/04) no ita simu ona, nune’e agora ita simu fali husi Australia nian ne’ebé apoiu husi maluk trabalhador oan sira iha Seasonal Work no mós NGO sira iha Australia hodi tau hamutuk sasan haruka mai iha Timor-Leste”.tenik nia.

Nia hatutan, apoiu umanitaria ne’e laiha fundus maibé apoiu ekipamentu prevensaun Covid-19 nia no mós aihan balun ba vitima inundasaun sira.

Sasan sira ne’e temporariamente sei lori ba tau iha armajem SAMES no iha ne’eba mak hafoin hare sasan sira ne’ebé atu lori ba iha SEPS.

Molok ne’e governu  Timor-Leste simu ona apoiu umanitaria husi nasaun internasional sira hanesan, Xina apoiu osan hamutuk dolar amerika rihun $106 no rihun $100 husi World Food Program (WFP), Estadus Unidus Amerika (EUA) liu husi International Organization for Migration (IOM) hamutuk dolar amerika rihun $100 no Australia, inklui nasaun sira seluk fó ajuda hahan.

Jornalista :Saturnina da Costa

Editor:Jose Sarito Amaral